गोर्खा आमसभा आइतबार सर्यो

लन्डन । गोर्खा सत्याग्रह संयुक्त संघर्ष समिति, बेलायत नेपालले गर्ने वृहत आमसभा एक दिन पछाडि सरेको छ । समितिले प्रमुख अतिथी सांसद वीरेन्द्र शर्माको कार्यव्यस्तता जनाउंदै आगामी आइतबार नर्थहोल्ट सोसियल क्लवमा कार्यक्रम गरिने सूचित गरेको छ ।

यसअघि शनिवार सोही स्थानमा सभा तय गरिएको थियो ।

शनिवार लेवोर पार्टीको निर्वाचन परेकाले आइतबार सार्नु परेको समितिका संयोजक कृष्णबहादुर राईले जनाए ।
समितिले नवनियुक्त सर्वदलीय संसदीय समिति (एपीपीजी) का अध्यक्ष सांसद वीरेन्द्र शर्माको सम्मान गर्ने र त्यसैदिन उनलाई ज्ञापन दिने कार्यक्रम राखेको छ ।

सयौं भूपू गोर्खा सहभागी हुने अपेक्षा राखिएको उक्त आमसभाका दिन सत्याग्रह समितिले गत महिना स्कटल्याण्डमा भएको प्रदर्शन र भावी कार्यक्रमबारे भूपू गोर्खाहरुलाई जानकारी दिने बताइएको छ । समितिले गत अगष्ट १० देखि १४ तारिखसम्म आफ्ना जायज र न्यायपूर्ण मागहरु पुरा गराउन बेलायत सरकार विरुद्ध दवाव दिने उद्देश्यले स्कटल्याण्डमा धर्ना, विरोध प्रदर्शन र स्कटिस नेतासमक्ष ज्ञापन बुझाएको थियो ।

समितिले आफ्नो भावी कार्यक्रममा बेलायत सरकारलाई थप दवाव दिन अक्टोवर २० तारिखका दिन फेरि संसद भवन अगाडि प्रदर्शन गर्ने जनाएको छ ।