रौतहट, २१ भदौ । मधेस सङ्घर्ष समन्वय समिति रौतहटले चारबुंदे माग गरी शान्ति सुव्यवस्था कायम गर्न स्थानीय प्रशासनसँग अपिल गरेको छ ।
मधेस सङ्घर्ष समन्वय समिति रौतहटका अध्यक्ष जगन्नाथप्रसाद केशरीद्वारा हस्ताक्षरित प्रेस विज्ञप्तिमा रौतहटमा लगाइएको दङ्गा क्षेत्र घोषणा हटाउनुपर्ने, संयुक्त लोकतान्त्रिक मधेसी मोर्चा र राष्ट्रिय मुस्लिम सङ्घर्ष गठबन्धनले उठाएको माग अविलम्ब सम्बोधन गर्नुपर्ने, मधेसीमाथि गरिएको दमन, गोली प्रहार र हिंसा तुरुन्त बन्द गर्नुपर्ने र स्वर्गीय राजकिशोर ठाकुरलाई सहिद घोषणा गर्नुपर्ने माग गरिएको छ ।
साथै विज्ञप्तिमा विगतमा भएको २२ र ८ बुंदे सम्झौतालाई तत्काल सम्बोधन गर्नुपर्ने भन्दै तराई मधेसमा देखिएको समस्याको सम्बोधन गर्न नेपाल सरकार, गृह मन्त्रालय र स्थानीय प्रशासनलाई अनुरोध गर्दछौँ भनिएको छ ।
यसैबीच जिल्ला सदरमुकाम गौरमा उत्पन्न असहज परिस्थितिलाई लिएर गत भदौ ८ गते लागू गरिएको दङ्गाग्रस्त क्षेत्र अझै कायम रहेको छ ।
जिल्ला सुरक्षा समितिको बैठकले गत भदै ८ गतेबाट लागू हुनेगरी गौर नगरपालिका तथा गौर–चन्द्रनिगाहपुर सडकखण्डको दायाँबायाँ १–१ किमी सडकलाई दङ्गाग्रस्त क्षेत्र घोषणा गरेको थियो ।
संयुक्त लोकतान्त्रिक मधेसी मोर्चाका कार्यकर्ताले आफ्ना विभिन्न मागलाई लिएर सरकारी कार्यालय तोडफोड गर्ने तथा सरकारी कार्यालयमा गई मधेस सरकार लेख्नेजस्ता कार्य गर्न थालेपछि पहिलो दिन निषेधाज्ञा जारी गरेको थियो भने त्यसपछिका दिनमा दङ्गाग्रस्त क्षेत्र कायमै छ ।
निरन्तरको बन्द तथा भेला, जुलुस, प्रदर्शनका कारण प्रभावित बन्न पुगेको गौरको जनजीवन सामान्य बन्दै गएको छ ।
पसल तथा व्यापार व्यवसाय सञ्चालन अवस्थामा रहेका छन् । लगातार हुने विरोध तथा प्रदर्शन दङ्गाग्रस्त क्षेत्र घोषणापश्चात् नभएको स्थानीय रवीन्द्र मण्डलले बताए ।
उनका अनुसार दङ्गाग्रस्त क्षेत्र घोषणापश्चात् पनि सुरक्षाकर्मी तथा प्रदर्शनकारीले संयमता अपनाएका कारण गौरको वातावरणमा सुधार भइरहेको छ । जिल्लाको अवस्था सहज भएपछि निषेधित क्षेत्र हट्ने जिल्ला प्रशासन कार्यालय रौतहटले जनाएको छ ।
जिल्लामा अझै सुरक्षा चुनौती अनुभव भइरहेकाले दङ्गाग्रस्त क्षेत्र घोषणाको समय कायमै रहेको प्रहरी उपरीक्षक प्रद्युम्न कार्कीले बताए ।
