१३ वर्षीया दिप्ती मिस जुनियर टिन ग्रेट ब्रिटेनको फाइनलमा

लन्डन । १३ वर्षीया दिप्ती सापकोटा अक्टोबर तेश्रो साता हुने मिस जुनियर टिन ग्रेट ब्रिटेनको फाइनलमा पुगेकी छिन् । बेलायतको कोभेन्ट्री निवासी उनी मिस जुनियर टिन कोभेन्ट्री २०१५ उपाधिसहित छनोटका विभिन्न चरण पार 
गर्दै फाइनलमा पुगेकी हुन् ।

आगामी २५ अक्टोबरका दिन कुल ६० प्रतिष्पर्धीबीच उनले अन्तिम प्रतिष्पर्धा गर्दैछिन् । प्रतियोगितामा लिटल मिस टिन ग्रेट ब्रिटेन, जुनियर टिन ग्रेट ब्रिटेन र मिस टिन ग्रेट ब्रिटेन गरि तीन बेग्लाबेग्लै उपाधि दिइने आयोजकले जनाएका छन् । ११ देखि १३ वर्षसम्मकाबीच लिटल मिस टिन ग्रेट ब्रिटेन, १३ देखि १५ वर्षसम्मका बीच जुनियर टिन ग्रेट ब्रिटेन र १६ देखि १९ वर्षका किशोरीबीच मिस टिन ग्रेट ब्रिटेन वर्गीकरणमा भिड्ने जनाइएको छ ।

ब्ल्याकपुल इम्पेरियल होटलमा हुने अन्तिम प्रतियोगितामा चार राउण्डमा सहभागी प्रस्तुत हुनेछन् जसमा परिचय, च्यारिटी, फेसन वेयर र 
इभिनिङ वेयर छन् ।

 

प्रतियोगिताको अघिल्लो दिन सबै प्रतिष्पर्धीबीच ट्यालेन्ट राउण्ड हुने दिप्तीले बताइन् । उनका भनाइमा त्यस दिन एकापसमा को कसरी घुलमिल हुन सक्छ, उसको आत्मबल कस्तो छ आदि जांचिन्छ र खुबीका आधारमा प्वाइन्ट दिइन्छ ।

अर्को महिना १४ वर्ष टेक्न लागेकी उनले टुगेदर फर सोर्ट लाइफ नामक च्यारिटीलाई सघाउनेछिन् । यसका लागि उनले समस्त नेपाली समुदायमा सहयोग गरिदिन अपिल गरेकी छिन् । उक्त च्यारिटीका लागि जति धेरै रकम संकलन गर्न सक्यो, उत्ति प्वाइन्ट बढ्ने भएर पनि उनी नेपाली समुदायबाट बढि आशावादी भएकी हुन् ।

हाल सिड्नी स्ट्रिगंर एकेडेमी कोभेन्ट्रीमा क्लास ९ मा अध्ययनरत उनी तीन वर्ष अघि बेलायत आएकी थिइन् ।

बाबा विष्णु सापकोटा र आमा कमलाकी सुपुत्री दिप्ती भविष्यमा लयर बन्न चाहन्छिन् ।