लन्डन । आफ्ना माग पुरा नभएको भन्दै लामो समयदेखि आन्दोलनरत भूपू गोर्खाहरुले बेलायत सरकारलाई थप दवाव दिन फेरि संसद भवन अगाडि प्रदर्शन गर्ने भएका छन् । गोर्खा सत्याग्रह संयुक्त संघर्ष समिति, बेलायत नेपालले आगामी अक्टोवर २० तारिखका दिन प्रदर्शन गरिने जनाएको हो । समितिले लन्डनस्थित नेपाली दूतावासले बेलायत नेपाल कुटनीतिक सम्वन्ध स्थापनाको द्विशतवार्षिकीका अवसरमा एउटा भव्य दिवा तथा रात्रीभोज आयोजना गर्न लागेको कुरा थाहा भएको जनाउंदै त्यस दिन विरोध र वहिष्कार गर्ने समेत जनाएको छ ।
केन्द्रीय समितिले विगतमा सर्वसम्वत निर्णय गरे मुताविक सम्पूर्ण कार्यक्रमहरु सशक्त ढंगले वहिष्कार, विरोध गरिने जिकिर समेत सत्याग्रहको छ ।
यसैबीच, समितिले नवनियुक्त सर्वदलीय संसदीय समिति (एपीपीजी) का अध्यक्ष सांसद वीरेन्द्र शर्माको सम्मानमा एक कार्यक्रम गर्ने भएको छ । आगामी सेप्टेम्वर १२ तारिख १२ बजे नर्थओल्ट सोसल क्लवमा एउटा आमसभा मार्फत सम्मान गरिने छ । शर्माकै आतिथ्यमा हुने उक्त सभामा भूपू गोर्खाहरुले ज्ञापनपत्र समेत दिने योजना राखेका छन् ।
समितिले गत अगष्ट १० देखि १४ तारिखसम्म आºना जायज र न्यायपूर्ण मागहरु पुरा गराउन बेलायत सरकार विरुद्ध दवाव दिने उद्देश्यले स्कटलेण्डमा आयोजना गरेको विभिन्न विरोध कार्यक्रमबारे स्मरण गराएको छ । उक्त विरोध अभियानमा सहभागी हुन इङ्ग्ल्याण्डबाट एकसय भूपू गोर्खा र तिनका परिवार स्कटल्याण्ड पुगेका थिए । गोर्खाहरुले १२ अगस्टका दिन स्कटल्याण्डको संसद परिसरमा मध्यान्ह १२ देखि ४ अपरान्ह बजेसम्म धर्ना दिएका थिए । साथै त्यही धर्ना भइरहेकै अवस्थामा पूर्व निर्धारित कार्यक्रम अनुसार स्कटिस राष्ट्रिय दलका सांसदहरु र युकिप दलका अध्यक्ष, महासचिव तथा अन्य पदाधिकारीहरुलाई ज्ञापन पत्र बुझाउंदै समितिले आफ्ना पीडा स्कटिस नेताहरु समक्ष राखेको थियो ।
सत्याग्रह समितिले १२ तारिख भन्दा अगाडि र पछाडि पनि अन्य सांसदहरुलाई संसद भवन भित्रै भेटेर आफ्ना माग राख्दै सहयोग अपेक्षा गरेको थियो । कतिपय सांसद तथा नेताहरुले वेल्स्को संसदमा पनि यस्तो प्रकृतिको कार्यक्रम गर्न उपयोगी हुने धारणा राखेका थिए भने युरोपियन संसदमा रहेका बेलायती सांसदहरुको सहयोग र समन्वयमा युरोपियन संसदद्वारा बेलायत सरकार विरुद्ध अतिरिक्त दवाव सृजना गर्न सकिने कुरा समेत सुझाएका थिए ।
विरोध अभियानपछि सत्याग्रह समितिले बेलायतले गोर्खाहरुलाई घोर अन्याय गरिरहेको र त्यो यथाशीघ्र अन्त्य हुनु पर्ने निष्कर्ष स्कटिसहरुको रहेको जनाएको छ ।
