एनआरएन युकेका अध्यक्षका चार आकांक्षीकाे समर्थन तिगेलालाई

लण्डन । आसन्न एनआरएन युकेको राष्ट्रिय समन्वय समितिको निर्वाचनमा अध्यक्ष पदका लागि चर्चामा रहेका चार आकांक्षीहरुले अध्यक्ष पदमा विश्वासदीप तिगेलालाई समथर्न गर्ने भएका छन् ।
शुक्रबार लण्डनमा आपसी छलफल गर्दै अध्यक्ष पदका लागि चर्चामा रहेका सूर्य नेम्वाङ, ठाकुर शर्मा, कल्पना आङबुहाङ र बुद्धिराम थापाले तिगेलालाई समर्थन गर्ने निस्कर्षमा पुगेका हुन् ।
वर्तमान कार्यसमितिका नेम्वाङ उपाध्यक्ष, शर्मा कोषाध्यक्ष तथा थापा र आङबुहाङ सदस्य रहेका छन् ।
वीनेपालीसित कुरा गर्दै नेम्वाङले तिगेलालाई सहयोग गर्ने सल्लाह भएकाले आफूले अध्यक्ष पदमा उम्मेदवारी नदिने बताए । सबैले सहमति गरौँ भन्ने आशय व्यक्त गरेका कारण आफू पनि सहमत भएको उनले थपे ।
अध्यक्षका दाबेदार शर्माले एनआरएन युके फेरि एउटै समूहको इशारामा चल्नसक्ने जोखिम बढेकाले बाघसँग जुघ्न बाघै भएर जानपर्ने आवश्यकतालाई हेरेर तिगेलालाई समर्थन गरेको बताए । गुरुङ समुदायबाट यसअघि दुईपटक एनआरएन युकेको नेतृत्व भइसकेको अवस्थामा यसपटक अरु समुदायलाई मौका दिनुपर्ने धारणा उनले व्यक्त गरे ।
अर्का अध्यक्षका आकांक्षी कल्पना आङबुहाङले एनआरएन युकेको निर्वाचन सहमतिबाट सम्पन्न होस् भन्ने मनशायले आफूहरुले तिगेलालाई समर्थन गरेको बताइन् । अरु उम्मेदवारहरुसित सहमतिका लागि छलफल गर्न तिगेलालाई नै जिम्मा दिइएको उनले बताइन् ।
अर्का अध्यक्षका दाबेदार बुद्धिराम थापाले भने धेरै जना अध्यक्षमा उठ्ने भएकाले आपसमा सहमति निर्माण गर्न सजिलो होस् भनेर पछि हटेको बताए । उनले तिगेला मात्र होइन सबै उम्मेदवारबीच सहमति होस् भन्ने आफ्नो चाहना रहेको प्रष्ट पार्दै उपाध्यक्षमा उम्मेदवारी दिने पनि घोषणा गरे ।
एनआरएन युकेका लागि शनिबार निर्वाचनका लागि उम्मेदवारको मनोनयन पत्र दर्ता हुने कार्यक्रम रहेको छ ।
अब अध्यक्ष पदमा दाबी गर्नेमा तिगेला, मुछेत्र गुरुङ, हीराधन राई र योगकुमार फगामी बाँकी छन् ।