शुक्रबार, असोज ९ २०७७ | Fri, September 25, 2020
नेपालको समय: ००:१० | UK Time: 19:25

२१ हजार परीक्षार्थीलाई उछिन्दै नेपाली विद्यार्थी विश्वकै उत्कृष्ट

वीनेपाली
२०७२ भदौ ११ गते १०:४८

Srijana

लन्डन । लन्डनमा अध्ययनरत एक नेपाली विद्यार्थीले एसोसिएसन अफ चार्टर्ड सर्टिफाइड अकाउन्टेन्ट्स (एसीसीए) परीक्षामा विश्वमै उत्कृष्ट अंक ल्याएर प्रथम स्थान हासिल गरेकी छिन् ।

चितवन लंकु ६ स्थायी निवासी सिर्जना भण्डारी गौतमले गत जुनमा भएको एसीसीए पि वान (प्रोफेशनल लेभल) परीक्षामा विश्वभरका २१ हजार ३ सय ७ जना परीक्षार्थीलाई उछिन्दै ८९ स्कोरसहित प्रथम स्थान हासिल गरेकी हुन् ।

‘नतिजासहित एसीसीएको इमेल आउंदा त म शुरुमा आश्चर्यचकित भएं’, खुशी बांड्दै उनले भनिन्, ‘मेरो सफलताका पछाडि लगाव र मिहेनत नै हो । अनि परिवारको प्रेरणा र साथ ।’

नेपाल छंदा नै उनी पढाइमा अब्बल थिइन् । अर्किड कलेज चितवनबाट ए लेभल उत्तिर्ण भए लगत्तै सन् २०१० सेप्टेम्बरमा यूके आएकी सिर्जनाले लन्डन मेट्रोपोलिटन युनिभर्सिटीबाट म्याथ एण्ड अकाउन्टिङमा ब्याचलर्स डिग्री गरेर एसीसीए पढ्न थालेकी थिइन् । ‘लन्डन आउने बित्तिकै शुरुतिर अलमल भयो’, उनले विगत सुनाइन्, ‘पढाउने तरिका फरक अनि यहांको संस्कृति र रहनसहन पनि । पछि विस्तारै एडजस्ट भएं ।’

हाल लन्डनस्थित एउटा व्यवस्थापन कम्पनी ‘एम एण्ड जी’ की जागिरे उनी लन्डनमा जागिर अनि पढाइ एकसाथ लैजान सजिलो भने नभएको अनुभव सुनाउंछिन् ।

बाबा रामराज भण्डारी र आमा ताराकी सुपुत्री २५ वर्षीया सिर्जनाले भविष्यमा अकाउन्टिङमै करिअर बनाउने लक्ष्य लिएकी छिन् । उनलाई श्रीमान् विशाल गौतमको पनि साथ छ । सासु पूर्णकला गौतम र ससुरा ओमिलाल गौतमको नाम समेत भुलिनन् उनले ।

image (8)

 

प्रतिक्रिया

सम्बन्धित सामाग्री

फेसबुक