हजार माइलको जोखिम यात्रा गरेर गोर्खाले बटुले दशहजार पाउण्ड

लन्डन । क्याप्टेन जोन आर्मस्ट्रङ र कर्पोरल अर्जुन लिम्बु उत्तरी क्यानेडियन किनारको साहसिक यात्रा सकेर ९३ दिनपछि ब्रिटेन फर्किएका छन् । सेकेन्ड बटालियन, दि रोयल गोर्खा राइफल्स् आवद्ध ति गोर्खा नेपालमा पिउने पानी र सरसफाइ योजनाका लागि कोष अभिवृद्धि गर्न उक्त साहसिक यात्रामा जुटेका थिए ।

चिसो बरफको यात्रा, थकान र बेला बेला अस्वस्थ हुनुपरेको क्षण । तर, कत्ति विचलित भएनन् उनीहरु । एल्स्मेयर टापु वरपर एकहजार माइल लामो यात्रामा उनीहरुले जोखिमयुक्त स्की, कायाक र पदयात्रा पार लगाए ।  उनीहरुको विश्व रेकर्ड गर्ने योजना भने सफल भएन ।

क्याप्टेन आर्मस्ट्रङ र कर्पोरल लिम्बुले ब्रिटिश सेनामा गोर्खा भर्तीको दुई सय वर्ष गांठका अवसरमा त्यस्तो साहसिक यात्रा गर्ने योजना वर्षदिन अघि बनाएका थिए ।

यात्राबाट उनीहरुले दि गोर्खा वेलफेयर ट्रष्टका लागि दशहजार पाउण्ड भन्दा बढि संकलन गर्न सफल भएका छन् ।

ब्रिटेन फर्किएपछि कर्पोरल लिम्बुले भनेका छन्, ‘मेरो पुर्खाले प्रथम र दोश्रो विश्वयद्ध अनि फकल्याण्ड युद्ध लडे । म आफैं अफगानिस्तान र इराक युद्धमा होमिंए । त्यसकारण मलाई यो यात्रा खासै समस्या लागेन ।’

केही समयपछि बिहे वन्धनमा बांधिन लागेका क्याप्टेन आर्मस्ट्रङलाई भने केही अप्ठेरो सामना गर्नुपरेको सम्झना छ । ‘तर, विभिन्न बाधा व्यवधानसंग जुध्ने हाम्रो प्रण र प्रशिक्षणले अनकण्टार क्षेत्रको यात्रा सफल गरायो’, उनी भन्छन् ।

ड्युटीमा फर्कनुअघि उनीहरु केही समय आराम गर्ने मनस्थितिमा छन् । उनीहरुले आफ्नो यात्राको बेलिविस्तार यसैवर्षको अन्त्यतिर 
गर्ने गोर्खा वेलफेयर ट्रष्टले जनाएको छ ।