अर्थमन्त्रीस्तरीय बैठकका लागि ‘एजेन्डा’सहितको प्रतिवेदन तयार

काठमाडौँ, २ भदौ । दक्षिण एसियाली क्षेत्रीय सहयोग सङ्गठन (सार्क)को अर्थमन्त्रीस्तरीय सातौं बैठकमा छलफल गरिने ‘एजेन्डा’सहितको प्रतिवेदन तयार पार्दै सचिवस्तरीय तयारी बैठक सकिएको छ ।

अर्थसचिव सुमनप्रसाद शर्माको अध्यक्षतामा भएको बैठकले भोलि छलफल हुने मुद्दाका विषयलाई अन्तिमरुप दिएको अर्थमन्त्रालयका उपसचिव लालबहादुर खत्रीले राससलाई जानकारी दिए ।

उनका अनुसार दोहोरो कर मुक्तिसम्बन्धी सक्षम निकायहरुबीच भएको प्रगति, भन्सार सहयोग, सार्क विकास बैंक स्थापना, सार्क विकास कोषको प्रभावकारी उपयोग, दक्षिण एसियामा वित्तीय प्रवाह र अन्तरक्षेत्रीय सदस्यराष्ट्रबीच लगानी प्रवद्र्धनका विषयमा छलफल हुनेछ ।

मन्त्रिस्तरीय बैठकले पारित गरेपछि मात्र निर्णयले अन्तिमरुप पाउने छ ।