जनसङ्ख्याको आधारमा समान सहभागिता माग

काठमाडौँ, ३२ साउन । राज्यका हरेक संरचनामा थारू समुदायको जनसङ्ख्याका आधारमा समान सहभागिताको विषय नयाँ संविधानमा नै सुनिश्चित गर्नुपर्ने माग सभासद्ले गरेका छन् ।

थारू समुदायसँग निकट विभिन्न सङ्घसङ्गठन आबद्ध थरुहट, थारूवान् संयुक्त सङ्घर्ष समितिले यहाँ आज आयोजना गरेको पत्रकारसम्मेलनमा सभासद्ले जनसङ्ख्याका आधारमा सङ्घीय व्यवस्थापिका र प्रदेश सभाको सदस्यको सङ्ख्या एवम् निर्वाचन क्षेत्र निर्धारण गरिनुपर्ने समेत माग गरेका छन् ।

समितिका संयोजक तथा सभासद् रामजनम चौधरीले थारू समुदायको विषयमा पहिलो संविधानसभाले पारित गरिसकेको विषयलाई मुख्य दलका शीर्षनेताले कटौती गरेको भन्दै आपत्ति जनाए ।

थारू कल्याणकारिणी सभाका अध्यक्ष धनीराम चौधरीले पछिल्लो पटक तराईका विभिन्न जिल्लामा भएको आन्दोलनका क्रममा घाइते भएकाको उपचार गर्नुपर्ने र पक्राउ परेकालाई तत्काल रिहाइ गर्नुपर्ने माग गरेका छन् ।

समितिका रमेशकुमार चौधरीले अधिकारका लागि सडक र सदनमा सशक्त आवाज उठिरहेको अवस्थामा पनि थारू समुदायको समग्र विषयलाई राज्यले कुनै वास्ता नगरेको भन्दै कडा सङ्घर्ष गर्ने चेतावनी दिए ।