हिन्थादा (म्यानमार), २५ साउन । म्यानमारमा जारी बाढीमा परी मृत्यु हुने व्यक्तिको सङ्ख्या एक सय पुगेको सोमबार स्थानीय सञ्चारमाध्यमले जनाएको छ ।
यस बाढीको प्रभाव राष्ट्रव्यापी रुपमा परेको र कम्तीमा पनि दश लाख व्यक्ति प्रभावित भएको बताइएको छ । बाढी प्रभावित इलाकाबाट लाखौं व्यक्ति विस्थापित भएका छन् ।
भीषण बाढीका कारण चार लाख ८६ हजार हेक्टर जमिन जलमग्न भएको र सोमध्ये चार लाख ३० हजार हेक्टर जमिन ध्वस्त भएको बताइएको छ ।
यस बाढीबाट ज्यान गुमाउनेहरूमा सबभन्दा बढी राखिन राज्यमा रहेका जनाइएको छ । त्यसैगरी मन्दालाय, साङगइ्ङग र सान राज्यका व्यक्तिहरुले पनि सो बाढीको प्रकोपबाट ज्यान गुमाएका छन् ।
भारी मात्रामा वर्षासँगै म्यानमारका विभिन्न क्षेत्रमा बाढीको प्रकोप निकै बढेको छ । सो बाढीका कारण अरु पनि कयौँ नागरिक हराएका छन् ।
म्यानमारमा बाढीबाट बर्सेनि ठूलो सङ्ख्याका नागरिक घरबारबिहीन हुने गरेका छन् । भारी मौसमी वर्षाका कारण भारत, नेपाल पाकिस्तान र भियतनाममा बाढी र पहिरोबाट सयौं व्यक्तिको ज्यान जाने गरेको छ ।
सन् २००८ को मे महिनामा म्यानमार आएको नगीर्स् नामको आँधीबाट कम्तीमा पनि एक लाख ३८ हजार व्यक्ति हराएका वा बेपत्ता भएका थिए ।
