बिहीबार, असोज ८ २०७७ | Thu, September 24, 2020
नेपालको समय: २३:३४ | UK Time: 18:49

लिबियाको राजनीतिक वार्ता सरयो

वीनेपाली
२०७२ साउन २६ गते ०:३३
फाइल फोटो । तस्विरः एपी

फाइल फोटो । तस्विरः एपी

जेनेभा (स्विजरल्यान्ड), २५ साउन । जेनेभास्थित संयुक्त राष्ट्रसङ्घ (यूएनओजी) का प्रतिनिधि सहभागितामा लिबियामा सोमबार हुने भनिएको नयाँ चरणको राजनीतिक वार्ता मङ्गलबारका लागि सरेको यूएनओजीले जनाएको छ ।

लिबियाबारेमा हुने राजनीतिक छलफल संयुक्त राष्ट्रसङ्घका महासचिव वान कि मुनका लिबियाका लागि विशेष प्रतिनिधि वर्डनाडिनो लिअन सोमबार जेनेभा पुग्न नसकेका कारण एक दिन पछि सारिएको राष्ट्रसङ्घले जनाएको छ ।

“लिबियाका बारेमा हुने भनिएको नयाँ चरणको राजनीतिक वार्ता आज हुन नसकेको साथै सम्भवत मङ्गलबार सुरु हुनेछ,” यूएनओजीले एक विज्ञप्ति जारी गरी जनाएको छ ।

लिबियाली एक अधिकारीसँगको बृहद् छलफलपछि गएको शुक्रबार लिअनले नयाँ चरणको वार्ता सोमबारदेखि बुधबारसम्म हुने घोषणा गरेका थिए ।

नयाँ चरणको वार्ताका लागि राष्ट्रसङ्घका महासचिवका लिबियाली विशेष प्रतिनिधिले लिबियाका मुख्य दललाई वार्ता सफल पार्न आफ्नो प्रयासलाई दुईगुणा बढाउँदै छलफलमा सहभागी हुन आग्रह गरेका थिए ।

उहाँले यहाँका राजनीतिक शक्ति, धार्मिक समुदाय तथा नागरिक समाजलाई विद्यमान राजनीतिक भिन्नतालाई घटाउँदै वार्तामा सहभागी हुन आग्रह गरेका थिए ।

लिबियामा भइरहेको द्वन्द्वलाई अन्त्य गर्ने प्रयासस्वरूप राष्ट्रसङ्घले विभिन्न चरणमा द्वन्द्वरत् पक्षसँग गएको सेप्टेम्बरदेखि समन्वय गर्दै आएको छ ।

राष्ट्रसङ्घको पहलमा भएको युद्धबिराम गर्ने सहमतिका बाबजुद पनि लिबियामा द्वन्द्व मत्थर हुन सकेको छैन । आक्रमण तथा प्रत्याक्रमणका घटना दोहोरिँदै आइरहेका छन् ।

प्रतिक्रिया

सम्बन्धित सामाग्री

फेसबुक