लण्डन । गैर आवासीय नेपाली संघ बेलायतका सचिव दासु पाण्डेले आगामी सेप्टेम्बर १३ मा हुने निर्वाचनमा उपाध्यक्षमा उम्मेदवारी दिने घोषणा गरेका छन् ।
मंगलबार एक विज्ञप्ती जारी गर्दै पाण्डेले उपाध्यक्ष पदमा उम्मेदवारी दिने घोषणा गरेका हुन् । कम बोल्ने र काममा विश्वास राख्ने पाण्डेले आफ्नो कार्यकालमा खेलेको भूमिकालाई एनआरएनए बेलायतलाई नजिकबाट हेर्नेले प्रसंसा गरेका छन् ।
तत्कालिन अध्यक्ष योगेनबहादुर क्षेत्री र हालका अध्यक्ष महेन्द्र कंडेलवीच एक एक बर्षको कार्यकाल बांडने सहमतिको पक्षमा सचिव पाण्डे उभिएका थिए । सहमति गरेपछि त्यसलाई मान्नु पर्ने अडानमा पाण्डे रहेपनि तत्कालिन महासचिव योगकुमार फगामी, तत्कालिन सचिव संगीता मरहट्टा क्षेत्रीकै पक्षमा लागेका थिए । एमाले निकट प्रवासी नेपाली मंचसँग सम्बद्ध रहेका पाण्डे अहिले सम्म कुनै टिममा देखिएका छैनन् ।
वर्तमान अवस्थामा एनआरएनए युके भित्र देखिएको असमझदारीलाई हटाउदै एकताबद्ध रुपमा अघि बढाउने उनले बताएका छन् । त्यस्तै, एक पटकको नेपाली सधैका लागि नेपाली भन्ने गैर आवासीय नेपाली संघको एजेण्डालाई टुङोमा पुरयाउन नेतृत्वदायी भूमिका निर्वाह गर्ने अठोट उपाध्यक्षका प्रत्यासी पाण्डेको छ ।
पाण्डेले विगतमा आफूले गरेका कामको मुल्यांकन गरि दिन पनि युकेवासी नेपालीलाई आग्रह गरेका छन् । उनी एक सफल व्यवसायी मानिन्छन् ।
