शनिबार, कार्तिक ८ २०७७ | Sat, October 24, 2020
नेपालको समय: ११:३४ | UK Time: 06:49

हवाई टिकटमा मनपरी भाडा

वीनेपाली
२०७२ साउन १५ गते १५:२१

fd57315048b2a0e2ee02ed04b0927842_Mमुगु, १५ साउन । नेपालगन्जदेखि मुगुको रारा विमानस्थल ताल्चसम्म उडान भर्ने निजी वायुसेवा कम्पनीले मनपरि भाडा असुल्दा यो क्षेत्रको हवाई यात्रा गर्ने यात्रु मारमा परेका छन् ।

नेपालगन्जदेखि मुगुका लागि हवाई सेवा प्रदान गर्दै आइरहेका गोमा एयर, तारा एयरले अलगअलग भाडादर कायम गरी मनपरि गरिरहेको देखिए पनि नियमन गर्ने निकाय भने मौन रहेको पाइएको छ ।

एउटै उडानमा यात्रा गर्ने हवाई यात्रुले अलगअलग भाडा तिर्ने गरेका छन् । नेपालगन्ज विमानस्थलमा टिकटमा दलाली गर्ने गिरोह रहेको र त्यो गिरोहले भाडादरमा एकरुपता ल्याउन नदिन ठूलो खेल खेल्ने गरेको पाइएको छ ।

भाडा दरमा एकरुपता ल्याउन तथा नेपालगन्ज विमानस्थलमा हवाई टिकटको दलाली गर्ने गिरोहको सञ्जाल तोड्न क्षेत्रीय प्रशासन कार्यालयलाई अनुरोध गरिसकेको जिल्ला प्रशासन कार्यालय मुगुका प्रमुख जिल्ला अधिकारी शम्भुप्रसाद रेग्मीले जानकारी दिए ।

नेपालगन्जदेखि मुगुको हवाई यात्रा गर्ने टाठाबाठा हवाई यात्रुले आठ हजारसम्म भाडा तिर्ने गरेका छन् भने सोझा सर्वसाधारणले रु दश ५०० हजारसम्म तिर्ने गरेका छन् । नेपालगन्ज विमानस्थलमा रहेका भिजिट कर्णाली र रारा भिजट कार्गो कम्पनीमार्फत वितरण गरिने हवाई टिकटमा मनपरि हुने गरेको र अर्को टिकट दलाली गर्ने अलग गिरोहसमेत रहेको मुगु उद्योग वाणिज्य सङ्घका अध्यक्ष नरवीर रावतले बताए ।

एउटै उडानमा तारा एयरको विमानबाट बिहिबार मुगु पुगेका अध्यक्ष रावतले एकतर्फी उनीसँगै आएका स्थानीयवासी रत्नसिंह मल्ल र पदमबहादुर मल्लले रु नौ हजार हवाई भाडा तिरे । तर अर्का यात्रु जङ्गबहादुर शाहीले रु आठ हजार मात्रै भाडा तिरे ।

नेपालगन्जदेखि मुगुका लागि हवाई उडान गर्ने निजी कम्पनीका जहाजको उडान तालिका छैन । चार्टर उडान गर्ने भन्दै उनीहरू मनपरि भाडा असुल गरिरहेका छन् । जिल्ला प्रशासन कार्यालयका सहायक प्रमुख जिल्ला अधिकारी लक्ष्मीप्रसाद भट्टराईले आफू नेपालगन्जबाट मुगु आउँदा चार्टर उडान भनेर रु दश हजार १५० तिरेको बताए ।

नियमित उडानका लागि नेपाल वायु सेवाको जहाजले रु चार हजार ५०० प्रतियात्रु हवाई भाडा कायम गरेको छ ।

निजी कम्पनीका जहाजमा यात्रा गर्ने कतिपय यात्रुले टिकट बिना नै बोर्डिङ पासका भरमा यात्रा गर्ने गरिरहेकाले त्यसको नियमन गर्न जिल्लाबाट सर्वपक्षीय पहल हुनुपर्ने जिल्ला प्रशासन कार्यालयको भनाइ छ ।

विमान कम्पनीले दिने इ–टिकटमा समेत भाडादर उल्लेख गरिएको हुँदैन ।

प्रतिक्रिया

सम्बन्धित सामाग्री

फेसबुक