धर्म र नागरिकता विषय थप स्पष्ट पारिने

काठमाडौँ, १२ साउन । प्रमुख चार राजनीतिक दलले संविधानको प्रारम्भिक मस्यौदामा जनताले दिएको सुझावलाई आधार मानेर धर्मको विषयमा नयाँ सहमति र नागरिकताको अस्पष्टतालाई स्पष्ट पार्ने भएका छन् ।

प्रधानमन्त्री निवास बालुवाटारमा आज बसेको चार दलका शीर्ष नेताको बैठकले जनताबाट प्राप्त सुझावका आधारमा धर्मको विषयमा नयाँ सहमति र नागरिकताका सम्बन्धमा देखिएको अस्पष्टतालाई स्पष्ट पार्ने निर्णय गरेको बैठकपछि मधेसी जनअधिकार फोरम (लोकतान्त्रिक) का अध्यक्ष विजयकुमार गच्छदारले जानकारी गराए ।

उनले भने – “जनताबाट प्राप्त सुझाव हिजो संविधानसभाका अध्यक्षसमक्ष पेस भएको छ । नागरिक सम्बन्ध समितिले आज सुझावहरु संविधानसभामा पेस गर्दै छ । केही मूल विषयमा अझै सहमति गर्न बाँकी भएकाले त्यसमा छलफल भइरहेको छ । संविधान सीमाङ्कनसहित घोषणा गर्ने तबरबाट छलफलको क्रम बढेको छ ।”

संविधानलाई अधिकतम स्वीकार्य बनाउन मस्यौदामा असहमति राखेका दलहरुसँग पनि भोलि छलफल गरिने भएको उनले बताए ।

एनेकपा (माओवादी) का उपाध्यक्ष नारायणकाजी श्रेष्ठले संविधानको मस्यौदामाथि विभिन्न संवैधानिक अङ्गका पदाधिकारीले पनि सुझाव दिने भएका कारण उनीहरुसँग पनि छलफल गरिने जानकारी दिए ।