हतारमा संविधान ल्याउन लागिएको यादवको आरोप

विराटनगर, ११ साउन । सङ्घीय समाजवादी फोरम नेपालका अध्यक्ष उपेन्द्र यादवले सत्ताप्राप्तिका लागि हतारमा संविधान ल्याउन लागिएको आरोप लगाएका छन् ।

संयुक्त लोकतान्त्रिक मधेसी मोर्चाद्वारा सोमबार विराटनगरमा आयोजित विरोधसभामा उनले ‘विगतमा भएका मधेसी र आदिवासी जनजातिको आन्दोलनलाई उल्टाएर ल्याउन लागिएको संविधान’ स्वीकार गर्न नसकिने स्पष्ट पारे ।

सद्भावना पार्टीका अध्यक्ष राजेन्द्र महतोले पहिचानसहितको सङ्घीयताका लागि सबैले आन्दोलन गर्नुपर्ने औँल्याए ।

तमलोपाका उपाध्यक्ष वृजेशचन्द्र लालले विगतमा गरिएका सहमतिका आधारमा संविधान जारी हुनुपर्ने बताए । समाजवादी फोरमका उपाध्यक्ष रकम चेम्जोङ, सभासद् उषा यादव, तमलोपाका केन्द्रीय सदस्य मोहम्मद कादिरलगायतले मधेसी, आदिवासी जनजाति, दलित, महिलाको अधिकारका लागि आआफ्ना धारणा प्रकट गरेका थिए ।