गर्मी सहन नसकेपछि समुद्रमा आफ्ना केटाकेटीसहित एक पाकिस्तानी । तस्विरः एएफपी
कराची, ७ असार । पाकिस्तानको दक्षिणी भागमा गर्मीको लहर फैलँदा करिब २०० व्यक्तिको मृत्यु भएको जानकारी अधिकारीहरूले सोमबार दिएका छन् । सरकारले यसरी लू फैलिएपछि यो समस्या समाधान गर्न सेनालाई आग्रह गरेको छ । यस तातो हावाले कराची नगरलाई सबभन्दा बढी प्रभाव पारेको बताइएको छ ।
मुलुकको सबैभन्दा ठूलो नगर कराचीमा तापक्रम ४५ डिग्री सेल्सियस पुगेको छ भने यहाँ कम्तीमा १८० व्यक्तिको मृत्यु भएको छ । मुलुकको दक्षिणी भाग पञ्जाव प्रान्तमा थप ११ व्यक्तिको मृत्यु भएको छ ।
छिमेकी मुलुक भारतको इतिहासमा हालसम्मको दोस्रो सबैभन्दा घातक गर्मीको लहरका कारण एक महिना अगाडि दुई हजारभन्दा बढी व्यक्तिको मृत्यु भएको थियो । त्यसपछि मृत्युको लहर पाकिस्तानमा देखिएको हो ।
सिन्ध प्रदेशमा सरकारका वरिष्ठ स्वास्थ्य अधिकारी डा. सबिर मेमनले मर्ने व्यक्तिको सङ्ख्या १८० पुगेको र साँझसम्म यो सङ्ख्या बढ्नसक्ने बताए । कराचीका पाँच अस्पतालमा एएफपीले लिएको तथ्याङ्क अनुसार मर्नेको सङ्ख्या २४९ पुगेको हुनसक्ने देखिएको छ । राष्ट्रिय विपत्ति व्यवस्थापनका प्रवक्ता अहमद कमलले सरकारले सैनिक तथा अर्धसैनिक बललाई राहत प्रयास गरिदिन आग्रह गरेको छ । यसमा नगरका विभिन्न भागमा लूको उपचारका केन्द्र स्थापना गर्ने कार्य पनि पर्छ ।
पाकिस्तानमा विद्युत आपूर्तिमा कटौती दैनिक जीवनको एक भाग भएको छ र यसका कारण पनि गर्मीबाट जोगिने प्रयास अझै कठिन बनेको छ । सिन्धको प्रान्तीय सरकारले सबै अस्पतालमा आपत्काल लगाएको छ । चिकित्सक, अन्य स्वास्थ्यकर्मचारीको बिदा रद्द गरिएको छ । अन्य स्वास्थ्यकर्मचारी तथा थप औषधिको व्यवस्था गरिएको छ । अन्य ११ व्यक्तिको मृत्यु सोमबार पञ्जाव प्रान्तको दक्षिणी भागमा भएको हो ।
मुल्तान नगरका एक स्वास्थ्य अधिकारीले पञ्जावको दक्षिणी भागमा लूसम्बन्धी रोगका कारण गत ४८ घण्टामा ११ व्यक्तिको मृत्यु भएको जानकारी दिए । चिकित्सकहरूले यीमध्ये प्रायःको मृत्यु लूका कारण भएको बताएका छन् ।
यो पाकिस्तानको सबैभन्दा गर्मी समय हो र शुक्रबार यहाँ दिउँसो खाना तथा पानी नखाने मुसलमान धार्मिक वर्तको महिना रमजान आरम्भ भएको छ । पाकिस्तान चिकित्सक सङ्घका पूर्व अध्यक्ष तथा वरिष्ठ चिकित्सक सेर साहले कराचीका गरिब जनता सबैभन्दा बढी जोखिममा परेको बताए ।
दुई करोड जनसङ्ख्यायुक्त कराचीमा विद्युतको कमीका कारण पानी आपूर्ति प्रणाली अवरुद्ध बनेको छ । सरकारद्वारा सञ्चालित पानीसम्बन्धी संस्थाले आफ्ना उपभोक्तालाई लाखौँ ग्यालन पानी उपलब्ध गराउन नसकेको जानकारी दिएको छ । पाकिस्तानको जलवायुसम्बन्धी कार्यालयले आइतबार कराचीमा तापक्रम ४३ डिग्री सेल्सियस र दक्षिणपश्चिमी तुर्बत नगरमा तापक्रम ४९ डिग्री सेल्सियस पुगेको जानकारी दिएको छ ।
आउँदो २४ घण्टामा तापक्रम अझै बढ्ने अनुमान गरिएको छ । यस साताको अन्त्यतिर आउने आँधीले मौसम चिसो बनाउनसक्ने अनुमान गरिएको छ । भारतको क्रूर गर्मीको लहरका कारण गत महिना कम्तीमा दुई हजार पाँच व्यक्तिको मृत्यु भएको थियो । यी मृत्यु प्रायः दक्षिणी राज्य आन्ध्रप्रदेश तथा तेलङ्गानामा भएको थियो ।
भारतमा प्रत्येक वर्ष गृष्मको तापक्रम बढ्दा धेरै गरिब जनताले ज्यान गुमाउने गर्छन् । यो वर्ष यस्तो मृत्यु इतिहासमा दोसो ठूलो सङ्ख्यामा भएको बताइएको छ ।
