लन्डन । लन्डनस्थित नेपाली दूतावासले आइसल्याण्डमा नेपाल पर्यटन प्रबर्धन कार्यक्रम गरेको छ । भूकम्पपछि दूतावासले पहिलोपटक यस खालको कार्यक्रम गर्दै नेपाल पर्यटकका लागि सुरक्षित रहेको सन्देश दिएको हो ।
राजधानी रेक्जाभिकस्थित फोस होटलमा आयोजित कार्यक्रममा कार्यवहाक राजदूत तेजबहादुर क्षेत्रीले नेपालका करिब ८० प्रतिशत पर्यटकीय स्थल सुरक्षित रहेका र बन्द पुरातात्विक सम्पदाहरु खुलिसकेका जनाउंदै आइसल्याण्ड सरकारलाई पर्यटकहरु नेपाल पठाएर सहयोग गरिदिन आग्रह गरे । क्षेत्रीले वर्तमान राजनीतिक घट्नाक्रम र आसन्न दाता सम्मेलनबारे अवगत गराउंदै नेपालको पुनर्निर्माणमा सघाउन पनि अपिल गरेका थिए ।
उक्त अवसरमा मिनिष्टर अफ इण्डस्ट्री, कमर्श एण्ड टुरिजम रेग्नियोर इलिन आर्नाडोटिरले नेपालको पुनर्निर्माणमा सघाउनेबारे विदेश मन्त्रालयमा कुरा राख्ने आश्वासन दिएको कार्यवहाक राजदूत क्षेत्रीले जनाए । मन्त्री आर्नाडोटिरले आफ्नो देशपनि ज्वालामुखीबाट आक्रान्त भएको जनाउंदै देशले कसरी पर्यटन प्रबर्धन गरिरहेको छ भन्नेबारे अनुभव सुनाएकी थिइन् ।
कार्यक्रममा नेपाल घुमिसकेका आइसल्याण्डवासी ज्वालामुखीवीद अरि ट्राउष्टी गुइमुन्डसन, सन् १९९७ मा सगरमाथा चढ्ने पहिलो आइसल्याण्ड नागरिक हालग्रीमुर म्यागनुसन र अर्का पर्यटनवीद हेल्जी बेडिक्टसनले आफ्नो नेपाल अनुभव सुनाउंदै नेपालको प्राकृतिक सौन्दर्यताबारे वर्णन गरे । ति वक्ताहरुले अरुलाई पनि नेपाल भ्रमण गर्न प्रेरित गरेका थिए ।
करिब ७० जना सहभागी कार्यक्रममा स्थानीय कलाकारले नेपाली संस्कृति झल्कने विभिन्न नाचगान प्रस्तुत गरेका थिए । दूतावासले सगरमाथा आरोही, वक्ता र अन्य टुर अपरेटरहरुलाई प्रशंसापत्र समेत प्रदान गरेको छ । पर्यटन प्रबर्धन कार्यक्रममा दूतावास कर्मचारी, लन्डनका सफल व्यवसायी पशुपति भण्डारीसहित केही नेपालीको समेत उपस्थिति थियो ।
कार्यक्रम समापनपछि त्यहांका विदेशमन्त्रीले दूतावास पदाधिकारीलाई दिवाभोज आयोजना गरेका थिए ।
स्मरणरहोस्, आइसल्याण्डले आज बुधवार विशेष कार्यक्रमबीच स्वतन्त्रता दिवस मनाउंदै छ । आइसल्याण्डमा करिब तीनसय नेपाली रहेको अनुमान छ ।
