शुक्रबार, कार्तिक ७ २०७७ | Fri, October 23, 2020
नेपालको समय: १६:४३ | UK Time: 11:58

भूकम्प पीडित नेपालीको सहयोगार्थ बेलायती किशोरीले २६ ठाउँमा गाउने

वीनेपाली
२०७२ जेठ २५ गते १९:३५

Shakila Pic

लण्डन । नेपालका भूकम्प पीडितहरुको सहयोगका लागि बेलायती एक किशोरीले युकेका विभिन्न भागमा साँगीतिक कार्यक्रम गर्ने भएकी छिन् ।
सिक्स्थ फर्म स्कुलकी विद्यार्थी १७ वर्षीया सकिला करिमले यही जुन २७ का दिन उनी अध्ययनरत न्युपोर्ट एसेक्सस्थित जोयस फ्रान्कल्याण्ड एकाडमीबाट साँगीतिक यात्रा शुरु गर्दैछिन् ।
‘म्याराथन अफ गिग्स’ नाम दिइएको साँगीतिक यात्राका क्रममा उनले २६ ठाउँमा गीत गाउने छिन् । हरेक माइलमा एक/एक कार्यक्रम गर्ने उनको योजना छ ।
उनी अझै साँगीतिक कार्यक्रम गर्ने केही स्थानहरुको खोजीमा छिन् । जसका लागि सहयोग गर्न उनले कार्यक्रम स्थलका धनीहरु, साँगीतिक कार्यक्रम आयोजकहरु, नेपाललाई सहयोग गर्ने च्यारिटीहरुलाई आव्हान गरेकी छिन् ।
सकिलाको अर्को साँगीतिक कार्यक्रम हार्टफोर्डस्थित कोन एक्सचेञ्जमा २ जुलाईमा हुनेछ । त्यसपछि बिसप्स स्टोफोर्डको रोडस सेन्टरमा १५ जुलाईमा अर्को कार्यक्रम हुने छ ।
सकिला लण्डन म्याराथनबाट प्रभावित भएर म्युजिक म्याराथनमा लागेको बताउँछिन् । उनले भनिन् ‘म पूर्वी लण्डनको बासिन्दा भएकाले हरेक वर्ष लण्डन म्याराथनका धावकहरुलाई हेर्छु । यसवर्ष लण्डन म्याराथन भइरहँदा नेपालमा भूकम्पको समाचार फैलिएको थियो । त्यसबेला मैले भुकम्पबाट प्रभावित मानिसहरुलाई कसरी सहयोग गर्न सकिन्छ भनेर सोचेँ ।’
‘यद्यपि म म्याराथन धावक थिइनँ तर कम्तीमा गिगाथन गरेर सहयोग गर्न सक्छु भन्ने ठानेँ । यदि मैले २६ वटा कार्यक्रम गर्न सकेँ भने सहयोगको आवश्यकता रहेका नेपालका मानिसहरुलाई सहयोग गर्न सक्छु’ उनले थपिन् ।
‘मेरा नेपाली साथीहरु छन्’ उनले भनिन् । उनी अध्ययनरत जोयस फ्रान्कल्याण्ड एकाडेमीमा धेरै गोरखाका छोराछोरीहरु अध्ययनरत छन् ।
‘हामी सबैलाई थाहा छ कि गोरखाहरुले कति कुशलतापूर्वक हाम्रो देशको सेवा गरे र गरिरहेछन् । यदि हामीले बेलायतमा उनीहरुका लागि केही गर्न सक्यौँ भने राम्रो हुनेछ’ उनले भनिन्  ।
सकिलाको साागीतिक कार्यक्रम आयोजना गर्न इच्छुकले उनलाई [email protected] मा सम्पर्क गर्न सक्नेछन् ।
सकिलाको समाजसेवा यो नै पहिलो भने होइन । सन् २०११ मा हेल्प फर हिरोज च्यारिटीका लागि उनले गीत रेकर्ड गरी सार्वजनिक गरिसकेकी छिन् ।
सकिला ह्वाइट चापल लण्डनमा जन्मेकी हुन् । गेटहाउस स्कुल बेन्थल ग्रीनबाट प्राथमिक स्तरको पढाइ पूरा गरेकी उनी पियानो, ड्रम, भायोलिन आदि आफैँ बजाउँछिन् । माइकल ज्याक्सन, फ्रेडी मर्करी, स्टिभी वण्डर, एल्टोन जोन, म्याडोना, लेडी गागा, मारिया केरी, एमी लि, एभ्रील, क्रिश्चिना अगुलेरा आदिबाट आफू प्रभावित भएको उनी बताउँछिन् ।
आफ्नो १३ औँ जन्मदिनबाट उनी गाउँदै आएकी छिन् । उनले प्रतिष्ठित वेम्ली स्टेडियममा इंग्ल्याण्ड र पोल्याण्डबीच विश्वकप छनौटको म्याच भएका बेला पनि गाइसकेकी छिन् । यस्तै अर्को ख्यातिप्राप्त रोयल अल्बर्ट हलमा पनि उनले विद्यालयको तर्फबाट गाइसकेकी छिन् ।

प्रतिक्रिया

सम्बन्धित सामाग्री

फेसबुक