सभाध्यक्ष नेम्वाङ समक्ष मस्यौदा

काठमाडौँ, १५ असार । संविधान मस्यौदा समितिका सभापति कृष्णप्रसाद सिटौलाले एकीकृत मस्यौदा संविधानसभाका अध्यक्ष सुवास नेम्वाङलाई बुझाएका छन् ।

सभापति सिटौलाले संविधानसभा सचिवालय सिंहदरबारमा विभिन्न दलको फरक मतसहितको मस्यौदा मंगलबार साँझ बुझाएका हुन् ।

मस्यौदा बुझ्दै सभाध्यक्ष नेम्वाङले नेपाली जनताले लामो समयदेखि प्रतीक्षा गरेको संविधानको मस्यौदा प्राप्त भएकामा खुसी व्यक्त गर्दै मंगलबारै नेपाली जनताले थाहा पाउने व्यवस्था गरिने जानकारी दिए ।

मस्यौदामा केही दलले फरक मत राखेका छन् । फरक मत राख्नेमा राष्ट्रिय प्रजातन्त्र पार्टी नेपाल र केही मधेसवादी दल छन् । दलहरूबीच लामो समयसम्म संविधान निर्माण विषयमा सहमति हुन नसक्दा संविधान निर्माण प्रक्रियाले गति लिन सकेको थिएन ।