लन्डन । केन्टरवरी नेपाली समाज महिला दिदीबहिनीले भूकम्प पीडितका लागि आर्थिक रकम तथा लत्ता कपडा संकलन गरेका छन् । उनीहरुले पीडितलाई नेपाल पठाउन ३० बक्स भन्दा बढि लत्ता कपडा यहांस्थित रेडक्रस शाखालाई हस्तान्तरण गरे । यस अलवा केन्टरवरी नेपाली समाजले करिब २ हजार ४८० पाउण्ड संकलन गरेको छ ।

राहत संकलनका लागि केन्टरवरी नेपाली समाज महिला दिदीबहिनी अध्यक्ष ममता सुनवार तथा उर्मिला बुढा मगरको सकृयतामा समाजका अन्य महिला सदस्यहरूले योगदान दिएका थिए ।

राहत व्यवस्थापन कार्यमा समाजका सदस्यहरू हरि बुढामगर, गोपाल सुनुवार, दिल थापा र ज्ञान पुनबाट समेत सहयोग भएको थियो ।

केन्टरवरी नेपाली समाजले संकलन गरेको २४८० पाउण्डमध्ये ८ सय ५७ पाउन्ड वियोडस्टार नेपाली रेस्टुरेन्टका प्रोप्राइटर दीपक मेहता र सदस्य रामप्रसाद श्रेष्ठबाट भएको थियो भने संयोजन कोषाध्यक्ष भीम आले मगरले गरेका थिए । यसका साथै पुस्तक, सिडी र लत्ताकपडाहरू संकलन गर्ने कार्य अझै जारी छ ।
समाजका अध्यक्ष कृष्ण तामाङ्ग, पूर्व अध्यक्ष तथा सल्लाहकार घनबहादुर थापा मगर, उपाध्यक्ष राजेन्द्र राई र सचिव हेम कुमार राई लगायतका कार्यकारिणीहरू राहत सहयोग संकलन कार्यमा लागि परेका छन् । 
यसैगरि समाजका सल्लाहकार जित घर्ती मगरले पनि नेपालमा करिव ६३ पाल र १२० बोरा चामल किनेर सिन्धुपाल्चोकतर्फ वितरणका लागि पठाउने प्रवन्ध गरेका छन् ।
साथै समाजको हालै सम्पन्न बैठकले नेपालमा महाभूकम्पमा परी दिवंगत भएका समस्त आत्माको चीरशान्तिका लागि एक मिनेट मौनधारण गरी शोक प्रकट गरेको छ ।