भूकम्पमा दिवंगतहरुको सम्झनामा रेडिङमा श्रद्धाञ्जलि सभा

लण्डन । नेपालमा अप्रि २५ मा आएको महाभूकम्पमा परी ज्यान गुमाउनेहरुको सम्झनामा बेलायतको रेडिङ शहरमा एक श्रद्धाञ्जलि सभाको आयोजना गरियो ।

रेडिङ बरो काउन्सिलका काउन्सिलर तथा मेयर टोनी जोन्सको आयोजना तथा स्थानीय नेपाली समुदायको संयोजनमा आयोजित सो कार्यक्रममा काउन्सिलरहरु, नेपाली संघ संस्थाका प्रतिनिधिहरु, एसियन कम्युनिटीका सदस्यहरु र सर्वसाधारणहरुको उपस्थिति थियो ।
दिवंगतहरुको सम्झनामा मैनबत्ती प्रज्वलन गरी गरिएको सो कार्यक्रममा काउन्सिलर मेयर जोन्सले आफू नेपाली समुदायसित ज्यादै नजिक रहेर काम गरिरहेको र नेपालमा आइपरेको विपत्तिका कारण आफूलाई ज्यादै दुःख लागेको बताए ।
नेपाललाई सहयोगका लागि बेलायत सरकारले देखाएको तत्परताका लागि धन्यवाद दिँदै उनले रेडिङ बरो सहयोगका लागि तयार रहेको र आफूले पहल गर्ने वचन दिए ।
काउन्सिलर लिज टेरी, एड कुपर र रब हृवाइटले पनि समवेदना व्यक्त गरेका थिए । सो अवसरमा कुपरले आफ्नी छोरीको जन्मदिनमा प्राप्त हुने उपहारहरु नेपालका भूकम्प पीडितलाई सहयोग दिने बताए ।
काउन्सिलर मेयर जोन्सले भूकम्प पीडितको सहयोगका लागि रेडिङ मेयर कोषको स्थापना गरेका छन् । जसमा रेडिङ युवा समूहले संजय दाहालको नेतृत्वमा सहयोग संकलन गर्दै आएको छ । सो युवा समूहका रविन्द्र श्रेष्ठ, शीला भट्टराई निरौला, रामेश्वर थापा, सुरेन्द्र उप्रेती लगायतले ५ हजार ४३६ पाउण्ड १६ पेन्स सहयोग संकलन गरी नेपाली समुदायलाई बुझाएका छन् ।
डा. कृष्ण रेग्मीको विशेष पहल, यादव श्रेष्ठको व्यवस्थापन संयोजनमा भएको सो कार्यक्रमको सञ्चालन डा. नविन आचार्यले गरेका थिए ।
नेपालीहरुको पीडामा कार्यक्रम आयोजना गरेकोमा स्थानीय नेपालीहरुले मेयरलाई धन्यवाद दिएका छन् ।