गोर्खाहरुले भूकम्प पीडितका लागि एकै दिन उठाए ५० लाख

 

लन्डन । आफ्नो मातृभूमि रोइरहेको खवरले उनीहरुको मन मात्र कसरी थामिन सक्थ्यो र ? सोचे, कर्मथलो बेलायत रहेपनि स्वदेशका लागि गर्ने बेला यही हो । योर्कस्थित इम्फाल ब्यारेक्स्मा रहेको २४६ गोर्खा सिग्नल्स् स्क्वाड्रोनका गोर्खाहरुले सडक र सपिङ सेन्टरमा गएर भूकम्प पीडितका लाति ३२ हजार पाउण्ड (करिब ५० लाख रुपैयां) संकलन गरेका छन् । टुर डि योर्कसायर नाम दिइएको उक्त अभियान अन्तर्गत गोर्खाहरु योर्क डिजाइनर आउटलेट, टेस्को लगायत सपिंग सेन्टर, रेल स्टेशन र सडक सडक डुलेर चन्दा संकलन गरेका हुन् । चन्दा डिजास्टर इमर्जेन्सी कमिटीका लागि संकलन गरिएको हो ।

अप्रेशन अफिसर क्याप्टेन टोम अल्ड्रेडले चन्दादाताहरु सबैप्रति आभार व्यक्त गरेका छन् । ‘म चन्दा दिने सम्पूर्ण योर्कवासीहरुप्रति कृतज्ञ छु’, टोमले स्थानीय दि प्रेसलाई एउटा पत्र लेख्दै भनेका छन्, ‘मानिसहरुको यो स्वतस्फूर्त सहयोग सांच्चिकै प्रशंसनीय छ ।’

टु सिग्नल रेजिमेन्टका धेरै गोर्खाको घर वा परिवार भूकम्पले प्रभावित भएका बताइएको छ ।

डिजास्टर इमर्जेन्सी कमिटीका लागि ब्रिटिश अभिनेत्री जोअना लुम्लेले शुरु गरेको अभियानमा शुक्रबारसम्म ४७ मिलियन पाउण्ड संकलन भएको छ ।

नेपालका भूकम्प पीडितहरुको राहत तथा उद्दारका लागि गोर्खाहरुको प्रत्यक्ष साथ छ । डिपार्टमेन्ट फर इन्टरनेशनल डेभलप्मेन्ट (डिएफआइडी) का अनुसार, भूकम्प लगत्तै दर्जनौं गोर्खा इन्जिनियर बोइङ सि १७ जहाजमा अत्यावश्यक राहत 
सामाग्री ११ सय सेल्टर किट्स, डोरी, १७०० सोलार बत्तिसहित नेपाल उत्रिएका 
थिए ।

दुर्गम हिमाली क्षेत्रमा हराइरहेका ब्रिटिश ट्रेकर म्याट कारापिटको खोजीमा पनि गोर्खाहरुनै परिचालन गरिएको छ ।