शुक्रबार, असोज २ २०७७ | Fri, September 18, 2020
नेपालको समय: १९:१३ | UK Time: 14:28

एमालेले माघ ५ लाई प्रस्थान बिन्दु मानेर सहमति खोज्ने

वीनेपाली
२०७१ माघ २४ गते १९:१५

काठमाडौं। नेकपा एमालेले माघ ५ गते भएको सहमतिलाई प्रस्थानबिन्दु बनाएर वार्तामा सहभागी हुन एकीकृत नेकपा माओवादी र मधेशवादी दलहरुलाई आह्वान गरेको छ। दलहरुबीच राज्य पुनर्संरचना बाहेकको विषयमा नयाँ संविधानको अन्तर्वस्तुमा सैद्धान्तिक सहमति बनेको दलहरुले बताएका थिए।CPN_Uml_Building8

स्थायी कमिटीको शनिबार भएको बैठकले सहमतिबाट माओवादी पछि हटेको निष्कर्ष निकाल्दै माघ ५ गतेको सहमतिलाई आधार बनाएर वार्तामा सहभागी हुन आह्वान गरेको छ। ‘दलहरूबीच न्याय प्रणाली, निर्वाचन प्रणालीका विषयमा सहमति भइसकेको छ । शासकीय स्वरूपमा फरक मत राखेर जान माओवादी अध्यक्षले सहमति जनाउनुभएको थियो,’ एमाले सचिव प्रदीप ज्ञवालीले भने, ‘प्रदेश संख्यामा भन्दा सीमांकनका विषयमा विवाद रहेको हो । माओवादी त्यो सहमतिबाट पछि हटेकाले समस्या भएको हो । सहमतिका प्रस्थानबिन्दु त्यही हुन सक्छ ।’

माघ ५ गते सहमति बन्न नसक्दा संविधानसभामा बहुमतीय प्रक्रिया अघि बढेको छ भने त्यसविरुद्ध एकीकृत नेकपा माओवादी नेतृत्व मोर्चाले सडक आन्दोलन घोषणा गरेको छ ।

‘सुरु भइसकेको प्रक्रिया रोक्ने भन्दा पनि सहमति भएको विषयलाई प्रश्नावलीबाट हटाउने गरी प्रक्रिया अघि बढाउनुपर्छ,’ ज्ञवालीले भने, ‘प्रक्रिया रोक्नुपर्ने आवश्यकता छैन ।’

एमालेले संविधानसभाबाट संविधान बन्ने ग्यारेन्टी भए संविधानका अन्तर्वस्तुमा लचिलो हुन सकिने निर्णय पनि लिएको छ ।

प्रतिक्रिया

सम्बन्धित सामाग्री

फेसबुक