नेकपा-माओवादीमा विशेष महाधिवेशनको माग

काठमाडौं। फुटको संघारमा पुगेको नेकपा–माओवादीलाई एक बनाइराख्न आइतबारबाट हुने विस्तारित केन्द्रीय कमिटी बैठकमा सचिव नेत्रविक्रम चन्दको समूह पनि सहभागी हुने भएको छ। चन्द र उनी निकट नेताहरुले बहिस्कारको घोषणा गरेपछि शनिबारबाट शुरु हुने भनिएको बैठक आइतबारसम्मका लागि सारिएको थियो।Picture_052

बैठकमा सचिव चन्द समूहले विशेष महाधिवेशनको प्रस्ताव लैजाने भएको छ । अध्यक्ष मोहन वैद्यसँग सबै विषय बैठकमा छलफल गर्ने सहमति भएपछि चन्द समूहले विशेष महाधिवेशनको प्रस्ताव लैजाने भएको हो ।

‘आइतबार हुने बैठकमा हामी विशेष महाधिवेशनको प्रस्ताव लिएर जान्छौ,’ चन्दनिकट पोलिटब्युरो सदस्य खड्गबहादुर विश्वकर्माले भने। आइतबारको बैठकमा सबै विषयमा छलफल हुनेछ । ‘अध्यक्षसँग भएको छलफलमा सबै विषय बैठकमा राख्ने सहमति भएपछि उहाँहरू (चन्द पक्ष) ले सहभागी हुने बताउनुभएको छ,’ नेकपा–माओवादीकी प्रवक्ता पम्फा भुसालले भनिन् ।

अध्यक्ष वैद्यसँग शनिबार दिउँसो भएको छलफलमा सचिव चन्दसँगै नेताहरू विश्वकर्मा, ईश्वरी दाहाल र तिलक परियार सहभागी थिए । ‘स्पष्टीकरण फिर्ता लिने कुरा भएको छ,’ विश्वकर्माले भने । अध्यक्ष र महासचिवको निर्देशनलाई अवज्ञा गर्दै गत साता चन्दले आफू निकट नेताहरुको कपिलबस्तुको जंगलमा राष्ट्रिय भेला आयोजना गरेका थिए।

एकीकृत नेकपा माओवादीबाट साढे दुई वर्षअघि विभाजित भएर बनेको नेकपा–माओवादीको विस्तारित बैठकलाई पार्टी पुनः विभाजन हुनबाट रोक्ने अन्तिम प्रयासका रूपमा लिइएको छ ।

 

 

प्रतिक्रिया

सम्बन्धित सामाग्री