रोजगारीका लागि तीन महिनामा सवा लाख नेपाली विदेसिए

काठमाडौं। रोजगारीका लागि मलेसिया र खाडी राष्ट्र जाने नेपालीको संख्या पछिल्लो तीन महिनामा ३३ प्रतिशतले बढेको छ। साउनदेखि असोज महिनाभित्रमा रोजगारीका लागि १ लाख २९ हजार १ सय ४० जना बाहिरिएको वैदेशिक रोजगार विभागको प्रतिवेदनमा उल्लेख छ। यो अघिल्लो वर्षको तुलनामा ३३ प्रतिशतले बढी हो।

गत वर्ष सोही अवधिमा ९७ हजार १ सय ८० जना मात्रै रोजगारीका लागि विदेसिएका थिए। रोजगारीका लागि मलेसिया, कतार, साउदी अरबर संयुक्त अरब इमिरेट (युएइ) नेपालीका लागि प्रमुख गन्तब्य देखिएको छ।

चाडबाडको समय भएपनि उल्लेखित देशमा कामदारको माग बढेपछि विदेसिनेको संख्या पनि बढेको विभागले जनाएको छ। यो अवधिमा सबैभन्दा बढी मलेसियामा ५७ हजार ७ सय ९६ नेपाली गएका छन्। अघिल्लो वर्ष यही अवधिमा यो संख्या २३ हजार १ सय २७ थियो।

त्यसैगरी कतार २७ हजार ९ सय ३४, युएइ २१ हजार ८ सय ६२ र साउदी अरब १३ हजार ७ सय १३ नेपाली रोजगारीका लागि गएका छन्। बैदेशिक रोजगारीमा नेपालका करिब ३० लाख नेपाली मलेसिया र खाडी पुगेका छन्।