लोडसेडिङ १२ घण्टामा राख्न भारतबाट २ सय ६० मेगावाट विजुली ल्याइने

काठमाडौं। नेपाल विद्युत प्राधिकरणले भारतको पावर ट्रेडिङ कर्पोरेसनबाट हिउँदमा थप ७० मेगावाट विजुली किन्ने भएको छ। योसँगै भारतबाट हिउँदमा दैनिक २ सय ६० मेगावाट विद्युत आयात हुनेछ। प्राधिकरणका अधिकारीहरुले भारतबाट सो भन्दा कम विद्युत ल्याउँदा लोडसेडिङ १२ घण्टामा सिमित गर्न नसकिने बताएका छन्।

प्राधिकरण र कर्पोरेसनबीच थप उर्जा आपूर्तिका लागि बुधबार नयाँ दिल्लीमा सम्झौता हुँदैछ। प्राधिकरणले गत वर्ष भारतबाट डिसेम्बर महिनामा १  सय ९० मेगावाट विद्युत आयात गरेको थियो।

प्राधिकरणले प्रतियुनिट ७ रुपैया ९५ पैसामा खरिद गर्न लागेको हो। भारतले १ सय २५ मेगावाट विजुली २४ सै घण्टा उपलब्ध गराउने छ भने बाँकी परिणाम प्राधिकरणले माग गरेको समयमा उपलब्ध गराउने छ। २ सय ३७ मेगावाट विजुली आयात गर्ने क्षमता भएको अहिलेको प्रशारण लाइनलाई मर्मत गरेर थप विजुली ल्याउन लागिएको हो।