सोलुखुम्बु । सोलुखुम्बुमा रहेका दुईवटा रेडियो सामुदायिक रेडियो सोलु एफएम र व्यावसायिक रेडियो शिखर एफएमले संयुक्त रूपमा आयोजना गरेको देउसीभैलो कार्यक्रमबाट सङ्कलन भएको रकमले अस्थायी प्रहरी चौकी दोर्पुका लागि फर्निचर उपलब्ध गराएका छन् ।
तिहारको अवसरमा खेलिएको देउसीभैलोबाट सङ्कलन भएको रकमले प्रहरीका लागि पाँच थान कुर्सी र एक थान टेबुल उपलब्ध गराएका हुन् । योङ स्टार क्लबको प्राङ्गणमा बुधबार भएको कार्यक्रममा योङ स्टार क्लब तथा सोलु एफएम सञ्चालक समितिका अध्यक्ष बुद्धिनारायण श्रेष्ठले प्रहरी नायब उपरीक्षक चन्द्रदेव राईलाई हिजो यहाँ आयोजित कायक्रममा फर्निचर हस्तान्तरण गरे ।
देउसीभैलो कार्यक्रमबाट रु ३९ हजार ८८६ सङ्कलन भएको थियो । फर्निचरण किनेर बाँकी रहेको रकम दुवै रेडियोका लागि प्राविधिक उपकरण खरिदका लागि खर्च गर्ने जनाइएको छ ।
कार्यक्रममा प्रहरी नायब उपरीक्षक चन्द्रदेव राईले चाडपर्व मनाउँदा गरेको रमाइलोसँगै सङ्कलन भएको रकम सदुपयोग गरेकामा खुसी व्यक्त गर्दै यस किसिमको कामबाट प्रहरी तथा सञ्चारकर्मीको सम्बन्ध सुदृढ हुने बताए ।
