डिभिजन थ्रि क्रिकेट: नेपाललाई १ सय १ रनको लक्ष्य

काठमाडौं। मलेसियामा जारी आइसिसी डिभिजन थ्रि प्रतियोगिताको दोस्रो खेलमा बर्मुडाले नेपाललाई १ सय १ रनको लक्ष्य प्रस्तुत गरेको छ। क्वाललम्पुरको सेलान्गोर टर्फ क्लबमा शुक्रबार टस हारेर ब्याटिङ गर्ने उत्रिएको बर्मुडाले ४० ओभर १ बलमा अल आउट हुँदै सय रन मात्रै बनाउन सक्यो।

नेपालका लागि अमृत भट्टराई, बसन्त रेग्मी र शक्ति गौचनले २-२ विकेट लिएका थिए। सोमपाल कामी र सागर पुनले १-१ विकेट लिएका थिए। बर्मुडाका दुई खेलाडी रन आउट भएका थिए।

नेपाली बलिङ आक्रमण सामु निरिह बनेको बर्मुडाका चार ब्याट्सम्यानले मात्रै दोहोरो अकमा रन बनाउन सके। यसअघि बिहीबार भएको खेलमा डिफेन्डिङ च्याम्पियन नेपाल युगान्डासँग २० रनले पराजित भएको थियो।