काठमाडौं। नयाँ संविधानको अन्तरबस्तुबारे सहमति जुटाउन नेपाली कांग्रेस, नेकपा एमाले र एकीकृत नेकपा माओवादीका नेताहरु काठमाडौंस्थित काँठ क्षेत्रमा रहेको गोकर्ण रिसोर्ट पुगेका छन् । बैठकमा तीन राजनीतिक दलका तीन तीन जना नेताहरु सहभागी छन्।
संघीयता, शासकीय स्वरुप र निर्वाचन प्रणाली जस्ता महत्वपूर्ण विषयमा प्रमुख तीन दलहरुबीच सहमति हुन बाँकी छ।
बैठकमा नेपाली कांग्रेसका वरिष्ठ नेता तथा पूर्व प्रधानमन्त्री शेरबहादुर देउवा, उपाध्यक्ष रामचन्द्र पौडेल र महामन्त्री कृष्णप्रसाद सिटौला, नेकपा एमालेको तर्फबाट अध्यक्ष केपी शर्मा ओली, पूर्व प्रधानमन्त्री माधवकुमार नेपाल र महासचिव ईश्वर पोखरेल छन् । त्यसैगरी माओवादीका अध्यक्ष पुष्पकमल दाहाल, पूर्व प्रधानमन्त्री बाबुराम भट्टराई र उपाध्यक्ष नारायणकाजी श्रेष्ठको सहभागिता छ।
संविधानसभाको संवैधानिक राजनीतिक संवाद तथा सहमति समितिको पहलमा मंगलबार र बुधबार दुई दिन वार्ता हुन लागेको हो। नेताहरुका लागि मंगलबार राति गोकर्ण रिसोर्टमै बासको व्यवस्था गरिएको छ।
