हिन्दु राष्ट्रका लागि सशस्त्र सङ्घर्ष गर्ने कांग्रेस नेताहरुको चेतावनी

काठमाडौं। ‘सनातन हिन्दु राष्ट्र नेपाल नागरिक संघर्ष समिति’को नाममा नेपाली कांग्रेसका नेताहरुले देशलाई हिन्दु राज्य घोषणाको अभियान चलाउने भएका छन्। काँग्रेस नेता हरिबोल भट्टराईको नेतृत्वमा रहेको विपी कोइराला चिन्तन प्रतिष्ठानले यस्तो सङ्घर्षको समायोजन गरेको हो। khum-bahadur-khadka

यो अभियानमा भ्रष्टाचारको आरोपमा कारावासको सजाय भोगेका पूर्वमन्त्री तथा कांग्रेसका नेताहरु खुमबहादुर खड्का र चिरञ्जिवी वाग्लेदेखि वयोवृद्ध नेता केबी गुरुङ समेतको सहभागिता रहेको छ।

नयाँ बानेश्वरमा भएको कार्यक्रममा पूर्व सभामुख तारानाथ रानाभाट, लक्ष्मणप्रसाद घिमिरे, पुष्पा भूसाल, डा. रामचन्द्र अधिकारी, पूर्णकुमार शेर्मा, केशव थापा, मार्शल जुलुम शाक्य, दूर्योधनसिंह चौधरी, हस्तबहादुर मल्ल, शिवराज योगी, झलकनाथ वाग्ले, सुरेन्द्र हमाल, प्रकाश कोइराला, सावित्री बोगटी, ओमकार श्रेष्ठ लगायतका नेताहरु रहेका थिए।

कार्यक्रममा पछिल्लो समयमा प्रधानमन्त्री सुशील कोइरालाको विश्वास पात्रको रुपमा देखा परेका केन्द्रीय सदस्य दीपकुमार उपाध्यायले अभियानप्रति ऐक्यबद्धता व्यक्त गरेका थिए।

पूर्वसांसदहरु शंकर पाण्डे, रामबहादुर विष्ट, अकलबहादुर विष्ट, तिलक न्यौपाने, रविन्द्रलाल श्रेष्ठ, रामजीवन सिंहलगायत पनि कार्यक्रममा उपस्थित थिए । यसैगरी सुशीला चौधरी, पार्वती डीसी चौधरी, राजीवविक्रम शाही, सुवर्णा ज्वारचन, नेविसंघका पूर्व महामन्त्री डा. टिका पोखरेल, पत्रकार देवप्रकाश त्रिपाठी, विश्व हिन्दू महासंघका पूर्वअध्यक्ष दामोदर गौतम, ट्रेड युनियन कांग्रेसका खिलनाथ दाहालसहित करिब ५ सय कांग्रेससँग आवद्ध नेताहरु सहभागी थिए।

भेलामा कांग्रेस महासमिति सदस्य समेत रहेका अधिवक्ता कुमार रेग्मीले ‘हिन्दु राष्ट्रः नेपालको पहिचान र राष्ट्रियताको आधार’ विषयक कार्यपत्र प्रस्तुत गरेका थिए । कार्यक्रमलाई सम्बोधन गर्दै खुमबहादुर खड्काले नेपाललाई विखण्डन गर्न पश्चिमा देशले अर्बौ रुपैया लगाएर नेपाललाई धर्म निरपेक्ष राष्ट्र जबरजस्ती घोषणा गरिएको आरोप लगाए। उनले आफ्नो कार्यक्रममाथि दमन भए सशस्त्र रुपमा प्रतिरोध हुने चेतावनी समेत दिएका छन्।

प्रतिक्रिया

सम्बन्धित सामाग्री