डोटीमा बस दुर्घटना, ३० को मृत्यु

काठमाडौ। डोटीमा एक यात्रुबाहक बस भीरबाट खस्दा कम्तीमा ३० जनाको मृत्यु भएको स्थानीय सञ्चार माध्यमहरुले जनाएका छन्। १ सय ५० यात्रु रहेको अनुमान गरिएको सो बस सोमबार दिउँसो भीरबाट १ सय ५० मिटर तल खसेको प्रहरीले जनाएको छ। डोटीको जोरायलबाट छुटेको बस कैलाली धनगढीतर्फ जाँदै थियो। दुर्घटना छतिवन गाबिस-५ कठपतेमा भएको हो। 

स्थानीय प्रहरीले घाइतेको अवस्था गम्भीर रहेकाले मृतकको सख्या बढ्न सक्ने जनाएको छ । प्रहरीले उद्दार गरिका मध्ये २० को अवस्था गम्भीर भएको जनाएको छ। स्थानीय बासिन्दा र प्रहरी राति अबेरसम्म घाइतेको उद्दारमा लागेका छन्।

घाइते मध्ये ६० जनालाई उपचारका लागि धनगढीस्थित सेती अञ्चल अस्पताल पठाइएको छ। सवारी साधन अभावले घाइतेलाई स्वास्थ्य केन्द्रमा पठाउन समस्या परेको प्रहरीले जनाएको छ। दुर्घटनास्थल भीमदत्त राजमार्गभन्दा १५ किलोमिटर पर जोरायल सडक खण्डमा पर्ने दुर्गम स्थानमा भएकाले यकिन विवरण आउन समय लाग्ने बताइएको छ ।