कर्मचारी कुट्ने कांग्रेसी नेता पक्राउ

काठमाडौं। नियमविपरीत चेक काट्न अस्वीकार गर्ने कर्मचारीलाई कुट्ने नेपाली कांग्रेस कास्कीका उपसभापति विष्णु बास्तोलालाई प्रहरीले पक्राउ गरेको छ । बास्तोला अध्यक्ष रहेको पोखरा उपत्यका नगरविकास समिति कार्यालयका लेखा अधिकृत दयामोहन आचार्यमाथि कुटपिट गरेको आरोप छ।  बास्तोलालाई मंगलबार हेम्जाबाट पक्राउ गरिएको हो ।

सुरक्षा माग गर्दै आचार्यले सोमबार वडा प्रहरी कार्यालय बैदामा उजुरी दिएका थिए । दुवैलाई राखेर मिलाउने प्रयास गरिए पनि सहमति नभएपछि बास्तोलालाई हिरासतमा राखिएको वडा प्रहरी कार्यालय बैदामका प्रहरी निरीक्षक सुन्दर तिवारीले जानकारी दिए ।

अध्यक्ष बास्तोला भने आफूले कुटपिट नगरेको दाबी गर्छन् । मन्त्रालयको स्वीकृतिबिना अनुदानका लागि चेक काट्न नमिल्ने भन्दै लेखा अधिकृतले चेक काट्न मानेका थिएनन्। त्यही निहुँमा बास्तोलाले कुटपिट गरेको आचार्यलाई उद्धृत गर्दै प्रहरीले जनायो।