प्रधानमन्त्री सुशील कोइराला राष्ट्र संघको ६९ औं महासभामा भाग लिन १५ सदस्यीय प्रतिनिधि मण्डलको नेतृत्व गर्दै शुक्रबार न्युयोर्क प्रस्थान गर्ने भएका छन्। कोइरालाले असोज १० गते महासभालाई सम्बोधन गर्ने कार्यक्रम छ।
न्युयोर्क पुग्नुअघि कोइरालाले अबुधावीमा मध्यपूर्व, पश्चिम एशिया र उत्तर अफ्रिकाका नेपाली राजदूत तथा मिसनका प्रमुखहरुलाई शनिबार सम्बोधन गर्ने छन्। मध्यपूर्वका देशहरु नेपालीका लागि सबैभन्दा ठूलो श्रम बजार हो।
न्युयोर्कमा रहँदा कोइरालाले छिमेकी तथा मित्र राष्ट्रका राष्ट्रप्रमुख तथा सरकार प्रमुखसँग द्वीपक्षीय वार्ता गर्ने छन्। राष्ट्र संघका महासचिव बान की मुनसँग कोइरालाले असोज ११ गते भट्ने कार्यक्रम छ।
कोइराला असोज ७ गते महासचिव मुनले आयोजना गर्ने जलवायु परिवर्तन सम्बन्धी सम्मेलनमा सहभागी हुने र सम्बोधन गर्ने कार्यक्रम छ। त्यसैगरी महासचिव मुन र अमेरिकी राष्ट्रपति बाराक ओबामाले राष्ट्र संघीय महासभाका सहभागीहरुका लागि आयोजना गर्ने कार्यक्रममा कोइरालाको सहभागी हुने छन्। असोज ११ गते अमेरिकामा बसोबास गर्दै आएका नेपाली समुदायसँग कोइरालाले अन्तरक्रिया गर्ने छन्। न्युयोर्कमा कोइरालाको क्यान्सर अस्पतालमा नियमित स्वास्थ्य परीक्षण पनि हुनेछ ।
