विवादका कारण नेपाली कांग्रेसको भातृ सगठन नेपाल विद्यार्थी संघको महाधिवेशन पाँचौ पटक स्थगित भएको छ । कांग्रेस पदाधिकारीहरुको शनिबार बिहान प्रधानमन्त्री निवासमा वालुवाटारमा बसेको बैठकले अनिश्चिकालसम्मका लागि महाधिवेशन स्थगित गर्ने निर्णय गरेको हो ।

‘अर्को सूचना नहुञ्जेलसम्मका लागि महाधिवेशन स्थागित गर्ने निर्देशन पार्टी पदाधिकारीको बैठकले दिएको छ,’ नेविसंघ प्रवक्ता युपी लामिछानेले वीनेपालीसँग भने, ‘विवाद भएको स्थानको मतदाता नामावली एक साताभित्र केन्द्रमा बुझाउन पनि निर्देशन भएको छ ।’ महाधिवेशन आइतबार प्रधानमन्त्री तथा नेपाली कांग्रेसका सभापति सुशील कोइरालाले उद्घाटन गर्ने कार्यक्रम थियो । नेविसंघले कीर्तिपुरमा सत्र गर्ने तयारी गरेको थियो भने २ हजार २ सय प्रतिनिधि सहभागी हुने जनाइएको थियो । नेविसंघमा एक दर्जन जिल्ला तथा प्रमुख क्याक्पसका महाधिवेशन प्रतिनिधिको बारेमा विवाद थियो । विवादका कारण केही जिल्लामा अधिवेशन समेत हुनसेकेको छैन । २०६८ माघमा रञ्जित कर्णलाई आयोजक कमिटी गठन गर्दै ६ महिनाभित्र महाधिवेशन गर्न निर्देशन दिइएको थियो ।