यो वर्ष विभिन्न समयमा गएको बाढी पहिरोमा परि मृत्यु र वेपत्ता हुनेको संख्या ५ सय नाघेको छ । सरकारले व्यवस्थापिका–संसद्, सुशासन तथा अनुगमन समितिको बैठकमा पेस गरेको पछिल्लो तथ्याङ्क अनुसार विपद्का घटनामा परी २६० को निधन, १६० घाइते र २५४ जना हराइरहेका छन् ।

यस वर्षको बाढी पहिरोबाट मुलुकभरका ४२ जिल्ला प्रभावित भएको र करिब सात अर्ब ७९ करोड बराबरको भौतिक क्षति भएको छ ।

विपद्का कारण आठ हजार ४८८ वटा घर पूर्ण रुपमा नष्ट भएका छन् । पीडित परिवारलाई हालसम्म करिब छ करोड १५ लाख रुपैया बराबरको खाद्यान्न र करिब चार करोड ७६ लाख रुपैया बराबरको गैरखाद्य पदार्थ वितरण गरिएको छ ।

यस्तै थप १० दिनका लागि करिब एक लाख ३३ हजार खाद्यान्न र लत्ताकपडाका लागि करिब ११ करोड २६ लाख प्रभावित जिल्लामा निकासा गरिएको छ । यस्तै प्रधानमन्त्री राहत कोषमा हालसम्म मुलुकभित्रबाटै ३५ करोड बराबर नगद सङ्कलन भएको र उल्लेख्य मात्रामा खाद्यान्न तथा लत्ताकपडासमेत उपलब्ध भएको छ ।

बाढीपहिराबाट प्रभावित ४२ मध्ये ४० जिल्लामा नागरिकको ज्यान गएको छ । प्रधानमन्त्री कार्यालयले तयार पारेको तथ्याङ्कअनुसार बाढीबाट बढी प्रभावित जिल्लामा सिन्धुपाल्चोक, दाङ, सल्यान, बाँके, बर्दिया, सुर्खेत,जाजरकोटर कैलाली छन् ।