लन्डन । लन्डनस्थित हिलिङ्डन वरो काउन्सिलले गोर्खा नेपाली समुदायका लागि बेग्लै समाधिस्थल दिएको छ । गोर्खा नेपालीहरुले वेष्ट ड्रेटनस्थित चेरी लेन सिमेट्री नजिक पिस मेमोरियल गार्डेनमा बेग्लै समाधिस्थल पाएका हुन् । अहिले २० वर्षका लागि समाधिस्थल छुट्याइएको छ ।
लन्डनमा नेपालीहरुका लागि बेग्लै समाधिस्थल दिनेमा हिलिङ्डन वरो काउन्सिल पहिलो भएको छ ।

हिलिङ्डन गोर्खा नेपलिज कम्युनिटीले बेग्लै समाधिस्थलका लागि वर्षदिन देखि नियमित पहल गरेको थियो । बेग्लै समाधिस्थल माग गर्दा काउन्सिलले हस्ताक्षरसहित ज्ञापन बुझाउन सुझाएपछि नेपलिज कम्युनिटीले करिब २ सय जनाको हस्ताक्षरसहित ज्ञापन बुझाएको थियो । उक्त ज्ञापन काउन्सिलरहरुको डिवेटमा वहुमतले पास गरेपछि मात्र समाधिस्थल पाइनेमा वहस नै नभइ गोर्खा नेपालीको योगदान सम्झेर सिधै अनुमोदन भएको कम्युनिटीका सचिव तेज पुनमगरले जनाए । पुनमगरले अब उक्त पिस मेमोरियल गार्डेनमा साइन पोष्ट बनाउने र आगामी नोभेम्बर ११ को पप्पी डे आसपासमा मेयरबाटै समाधिस्थल औपचारिक उद्घाटन गर्ने योजना रहेको वीनेपालीलाई सुनाए ।

गोर्खाहरुले विगत २०० वर्ष देखि बेलायती साम्राज्यका लागि लड्दै आएपनि अरु समुदाय जस्तो बेग्लै समाधिस्थल आफूहरुको नभएको गुनासो हिलिङ्डन काउन्सिलसमक्ष गर्दै आएका थिए । काउन्सिलले हालैमात्र अध्यक्ष सूर्य इम्सङ लिम्बु र सचिव तेज पुन मगरलाई मेमोरियल गार्डेनमै बोलाएर समाधिस्थल दिने प्रस्ताव अनुमोदन भएको अवगत गराएको थियो ।

हिलिङ्डन गोर्खा नेपलिज कम्युनिटीको स्थानीय काउन्सिलसंग राम्रो प्रभाव छ । पप्पी डे परेडमा भाग लिने देखि लिएर मेयर, एमपीको च्यारिटीमा नियमित सघाउने गोर्खा नेपालीले कार्निभलमा समेत उपस्थिति जनाएर विजयी भएपछि काउन्सिल पदाधिकारी नेपालीसंग झन् प्रभावित भएको बुझाइ नेपाली समुदायको छ ।