लाखौं रुपैयाँ घुस लिएको आरोपपछि नेपालका मन्त्री राजकुमार गुप्ताद्वारा राजीनामा

काठमाडौँ । लाखौं रुपैयाँ घुस लिएको आरोपपछि नेपाल सरकार सङ्घीय मामिला तथा सामान्य प्रशासनमन्त्री राजकुमार गुप्ताले पदबाट राजीनामा दिनुभएको छ । उहाँले मंगलबार प्रधानमन्त्री केपी शर्मा ओलीसमक्ष राजीनामा दिनुभएको हो ।

मन्त्री गुप्ताले आफूमाथि लागेको आरोपको अनुसन्धान गरी सत्यतथ्य बाहिर ल्याउन सहयोग पुगोस् भनेर राजीनामा दिएको बताउनुभयो । उहाँले आजसम्म आफूलाई सहयोग गरेका सबैप्रति धन्यवाद व्यक्त गर्दै आगामी दिनमा पार्टीले दिएको जिम्मेवारी निष्ठापूर्वक पूरा गर्ने प्रतिबद्धता व्यक्त गर्नुभयो । उहाँका बारेमा विभिन्न सञ्चारमाध्यम तथा सामाजिक सञ्जालमा लाखौँ रुपैयाँ घूस लिएको श्रव्य सामग्री सार्वजनिक भएको छ ।

गुप्ता नेकपा एमालेका नेपाली राजनीतिज्ञ हुनुहुन्छ । उहाँ प्रतिनिधि सभा निर्वाचन, २०७९ मा पर्सा ३ बाट प्रतिनिधिसभामा निर्वाचित हुनुभएको थियो ।