मगर महिला संघ यूके स्विन्डनको अभियान : स्वास्थ्यका लागि २२५३ पाउन्ड संकलन

लन्डन । मगर महिला संघ यूके स्विन्डन शाखाले ब्रेस्ट क्यान्सर (स्तन क्यान्सर) च्यारिटीका लागि २२ सय ५३ पाउन्ड संकलन गरेको छ । शाखाले परोपकारी अभियानअन्तर्गत १ जुनदेखि ३० जुन २०२५ सम्म दौड, साइक्लिङ तथा वाकिङमा ७०० किलोमिटर दूरीको चुनौती पार गर्दै उक्त सहयोग संकलन गर्न सफल भएको शाखा अध्यक्ष सरस्वती थापा मगरले जानकारी दिनुभयो । संघले प्रारम्भमा २ हजार पाउन्ड संकलन गर्ने लक्ष्य राखेको थियो ।

अभियानमा सहभागीहरूले ७०० किलोमिटर दूरी पार गर्ने लक्ष्य राखे पनि अन्त्यमा कुल ९२९ किलोमिटर दूरी पार गर्दै उल्लेखनीय सफलता हासिल गर्नुभएको हो । संघकी अध्यक्ष सरस्वती थापा मगरको नेतृत्वमा सञ्चालित अभियानमा मालती थापा मगर, अन्जु राना मगर, ज्ञानु थापा मगर, सनम पुन मगर, रिमा पचभैया मगर र रोजी तिलिजा मगर सहभागी हुनुहुन्थ्यो ।

अध्यक्ष थापा मगरले अघिल्ला वर्षहरूमा पनि डिमेन्सिया, ग्रेट अर्मन्ड स्ट्रिट हस्पिटल, म्याकमिलन क्यान्सर र मेन्टल हेल्थका लागि च्यारिटी फन्ड संकलन गर्नुभएको थियो । यो उहाँको पाँचौँ वर्षको परोपकारी अभियान हो । अध्यक्ष थापा मगरसहित सम्पूर्ण टिमले अभियानमा बेलायतवासी दाजुभाइ, दिदीबहिनी, मित्रहरूलगायत कार्यस्थलका सहकर्मीहरूबाट प्राप्त साथ, सहयोग र प्रेरणाका लागि आभार व्यक्त गरेको छ ।