कुलमान घिसिङ अगस्ट दोस्रो साता बेलायत आउनुहुने

लन्डन । नेपाललाई लोडसेडिङबाट मुक्त गराएर सबैको घरमा उज्यालो भित्र्याउने अभियन्ता कुलमान घिसिङ अगस्ट दोस्रो साता बेलायत आउनु हुने भएको छ ।

तमुधीं यूकेको १६ औं नेपाली मेलालगायत बेलायतमा विभिन्न संघ संस्थाको कार्यक्रममा सहभागी हुन घिसिङ यहाँ आउन लाग्नुभएको हो । उहाँ नेपाल विद्युत् प्राधिकरणको निवर्तमान कार्यकारी निर्देशक हुनुहुन्छ ।

घिसिङले १०/११ अगस्टमा अमेरिका भ्रमणबाट सिधै बेलायत आउने तयारीमा रहेको जानकारी दिनुभएको छ । तमुधीं यूकेको यस वर्ष नेपाली मेला २४ अगस्टमा केम्पर्टन पार्कमा हुँदैछ ।

यसैबीच घिसिङ बेलायत आउनुहुने भएपछि गैर आवासीय नेपाली संघ बेलायतले घिसिङसँग आगामी १५ अगष्ट साँझ अल्डरसटस्थित एम्पायर हलमा ‘मिट एन्ड ग्रीट’ राखेको छ । सो अवसरमा घिसिङकै हातबाट पुनः नियुक्त भएका संघका सल्लाहकारहरुलाई विशेष सम्मान गर्ने कार्यक्रम रहेको एनआरएनए यूकेका अध्यक्ष प्रेम गाहामगरले जानकारी दिनुभयो ।

अध्यक्ष गाहामगरले प्रमाणपत्रसहित सम्मान गरिने हुँदा सबै सल्लाहकारहरुलाई अनिवार्य उपस्थितिका लागि बेलैमा बिदा प्रबन्ध गर्न अनुरोध गर्नुभएको छ । कुल २२ हजार ५५३ पन्जीकृत सदस्यहरुले म्याण्डेट दिएबमोजिम २७ मार्चमा निर्वाचित यस कार्यसमिति नै आधिकारिक भएकाले कुनै पनि भ्रममा नपर्न पनि गाहामगरले अनुरोध गर्नुभएको छ ।