बेलायतमा अगस्ट १६ मा दोस्रो संस्करणको काव्य–सन्ध्या हुने

लन्डन । बेलायतमा आगामी १६ अगस्ट २०२५ मा दोस्रो संस्करणको काव्य–सन्ध्या हुने भएको छ ।

साहित्य संगालो बेलायत र नेपाली बुक्स यूकेको आयोजनामा अल्डरसटस्थित सुसी मोटो रेस्टुराँमा काव्य-सन्ध्या हुने भएको हो ।अघिल्लो वर्ष सेप्टेम्बर २८ मा अल्डरसटमै पहिलोपटक कविता वाचन कार्यक्रम भएको थियो ।

यस वर्षको कार्यक्रममा आठजना कविले प्रस्तुति दिनेछन् । साहित्य संगालो यूकेका संयोजक साहित्यकार केदार संकेतका अनुसार सारंगी र टुङ्गनाको धुनमा कविहरूले कविता वाचन गर्नेछन् । ‘हामीले कार्यक्रमलाई पुरै साहित्यमय बनाउने सोचेका छौँ । प्रमुख अतिथि, माला, खादा र कुनै औपचारिक उल्झनबिना विशुद्ध कवितामय साँझ बनाउने तयारी गरेका छौँ’, संकेतले भने ।

कविहरूले आफ्ना तीन–तीन थान कविता नेपाली मौलिक बाजा—टुङ्गना र सारंगीको साथमा प्रत्यक्ष प्रस्तुत गर्ने उनले बताए ।

गत वर्ष कविता वाचन गरेका कविहरूमा नरेश काङमाङ राई,डा.सङ्गीता स्वेच्छा, जीवन तिवारी, शान्ति लिम्बु, निर्भीकजङ्ग रायमाझी, खुपेन सुनुवार, मुकेश राई, डा. रूपक श्रेष्ठ, रहेका थिए ।