प्रवासी नेपाली मञ्च यूकेको अध्यक्षमा पशुपति पोखरेल

लन्डन । नेकपा एमालेनिकट प्रवासी नेपाली मञ्च (ओएनएफ) यूकेको अध्यक्षमा पशुपति पोखरेल सर्वसम्मत चयन हुनु भएको छ ।

लेस्टरमा आइतबार १५ जून २०२५ मा सम्पन्न नवौं अधिवेशनले पोखरेलको नेतृत्वमा नयाँ कार्यसमिति चयन गरेको हो । उपाध्यक्षहरुमा प्रतिमा जिसी, डा मुकुन्द बास्तोला, लिलामान शेरपुञ्जा पुन र सुदेशा बजगाईं, सचिवमा गंगा क्षेत्री, उपसचिवमा हरि आचार्य, श्याम लुईंटेल र दुर्गा बानियाँ चुनिनुभएको छ ।

सदस्हरुयमा शम्भुप्रसाद अर्याल, अर्जुन चापागाईं, तारानाथ भण्डारी, अर्कराज तिम्सिना, वीरकाजी गुरुङ, अञ्जु पाठक र प्रेम गुरुङ चयन हुनुभएको छ ।

अधिवेशनका प्रमुख अतिथि नेकपा एमाले केन्द्रीय कमिटी महासचिव शंकर पोखरेललगायतका नेताले नवनिर्वाचित पदाधिकारीहरुलाई बधाई तथा शुभकामना दिनुभएको थियो । नवनिर्वाचित कमिटीका पदाधिकारीहरुलाई मञ्चको अन्तरराष्ट्रिय कमिटीका अध्यक्ष सञ्जय थापाले शपथग्रहण गराउनुभएको थियो ।

एमालेका केन्द्रीय महासचिव पोखरेल र नेपाली दूतावास लन्डनका राजदूत चन्द्रप्रसाद घिमिरेले एक समरोहबीच अधिवेशन उद्घाटन गर्नुभएको थियो । उद्घाटन समारोहमा महासचिव पोखरेलले गैरआवासीय नेपालीहरुले संविधानले प्रदान गरेअनुरुपको नागरिकताको अधिकार प्राप्त गर्ने बताउनुभयो । उहाँले नीतिगत निर्णय भैसकेकाले व्यवहारिक रुपमा कानुनको अध्ययन गरेर चाँडै हल गर्ने जानकारी दिनुभयो ।

एमालेले नै नेपालको समृद्धिको नेतृत्व गर्ने महासचिव पोखरेलको दाबी थियो । ‘नेपाली जहाजलाई यूरोप उडान भर्न लगाएको बन्देजलाई न्यायपूर्ण नभएको अन्य अन्तर्राष्ट्रिय उडान भर्न दिएको बारेमा प्रश्न गर्न तपाईंहरुले गर्न सक्नु पर्छ,’ उहाँले भन्नुभयो । प्रवासमा नेपालीले गरेको दु:ख नेपालमा गर्ने हो भने नेपालमा धेरै सम्मान पाउनेले भएकाले आआफ्नो ठाउँमा काम गर्न उहाँले अनुरोध गर्नुभयो । त्यस्तै, प्रवासी नेपालीहरुले अन्तर्राष्ट्रिय समुदायलाई पयर्टन, उर्जा, कृषिमालगायतका क्षेत्रमा थप लगानीका लागि सहयोग गर्न आग्रह गर्नुपर्ने उहाँको सुझाव थियो । उहाँले एमाले नेतृत्वमाथि सांघातिक रुपमा गरिएको हमला, ओम्नी, गिरीबन्धुलगायतका बारेमा निष्पक्ष छानबिन गरे क्लीन चिट पाउने बताउनुभयो । महासचिव पोखरेलले युवापुस्ता नेतृत्वका रुपमा अघि आउनु पर्ने बताउनुभयो ।

बेलायतस्थित नेपाली राजदूत घिमिरेले पाँच महिने कार्यकाल बिताउँदै गर्दा बिट्रिस सोसाइटीसँग सम्पर्क बढाउने अभियानमा लागि रहेको बताउनुभयो । नेपाल सरकारले सुरु गरेको समृद्धिको एजेण्डालाई सफल बनाउन थप एकताको खाँचो रहेको उहाँको जोड थियो ।

ओएनएफ अन्तर्राष्ट्रिय कमिटी अध्यक्ष संजय थापाले एनआरएनएको विवाद आपसी छलफलबाट समाधान खोज्नु पर्ने बताउनुभयो । राजनीतिक दलहरु र अदालतका ढोकामा पुग्न नहुनेमा उहाँले जोड दिनुभयो ।

ओएनएफ यूके इन्चार्ज सरस्वती केसीले समृद्ध नेपाली सुखी नेपालीको अभियानमा प्रवासबाट सहयोग गरिरहेको बताउनुभयो । अधिवेशनको सफलताको शुभकामना दिन जनसम्पर्क समिति बेलायतका अध्यक्ष युवराज सिंह पुग्नुभएको थियो । उहाँले भ्रष्टाचार नियन्त्रणमा महासचिव पोखरेको भूमिकाको अपेक्षा गर्नुभयो ।

जनप्रगतिशील मञ्च यूकेको नेता रण केसीले मिडल्याण्डको तर्फबाट सबैलाई धन्यवाट दिनुभयो । सिर्जनशील समाजका अध्यक्ष पुण्डरी अर्याल, एनआरएनए आईसीसी उपाध्यक्ष डा हेमराज शर्माले दोस्रो पुस्ताका लागि गैरआवासीय नेपाली नागरिकता सुनिश्चित गर्न एमाले नेतृत्वलाई आग्रह गर्नुभयो ।

कार्यक्रममा उपस्थित मानुभावहरुलाई उपाध्यक्ष कृष्ण भण्डारीले स्वागत गर्नुभएको थियो । अर्का उपाध्यक्ष डा.मुकुन्द बास्तोलाले एमाले एकताबद्ध शक्तिका रुपमा रहेको जनाउनुभयो । अध्यक्ष तुंगभद्र भुसालले अधिवेशनमा उपस्थित सबैलाई शुभकामना तथा धन्यवाद दिनुभएको थियो ।

कार्यक्रमको बीचमा सांस्कृतिक कार्यक्रम समेत गरिएको थियो । अधिवेशनमा भाग लिन स्कटल्याण्ड, वेल्स, नर्दन आयरल्याण्डसहित बेलायतभरबाट एमालेका नेता तथा कार्यकर्ताहरु उपस्थित भएका थिए ।

त्यस्तै, अभिवेशनमा भाग लिन नेपालबाट पोलिटब्युरो सदस्य सुजिता शाक्य, ओएनएफ अन्तर्राष्ट्रिय कमीटी सचिवालय सदस्य प्रभु थापा, युरोपबाट सन्तोष भट्टराईलगायतका ओएनएफ यूकेका पूर्वअध्यक्षहरु पदाधिकारीहरु, कार्यकर्ताहरुको बाक्लो उपस्थिति थियो ।