बेलायतवासी साहित्यकार हितानको नयाँ कृति ‘मलाई आर्यघाट लगेर नजलाउनु’

काठमाडौँ । बेलायतवासी साहित्यकार विजय हितानको नयाँ कृति ‘मलाई आर्यघाट लगेर नजलाउनु’ तयार भएको छ ।

हितानको उक्त पर्या कवितासंग्रह कृति नेपाली पर्या साहित्य प्रतिष्ठानको आयोजनामा तथा साहित्य पोष्टको सह–आयोजनामा शनिबार ३१ मे २०२५ मा प्रज्ञा प्रतिष्ठानमा हुने ‘दशौं वातावरण साहित्य गोष्ठी’ मा लोकार्पण गर्ने कार्यक्रम छ । वातावरणीय सरोकार बोकेको यस कवितासंग्रहले प्रकृति, जीवन, र वातावरणीय परिवर्तनबारे गहिरो अनुभूति र चिन्तन प्रस्तुत गरेको छ । लेखक हितानले वातावरण विज्ञानमा स्नातक गर्नुभएको छ र उहाँ लामो समयदेखि वातावरणीय संरक्षणका क्षेत्रमा सक्रिय हुनुहुन्छ ।

गोष्ठीमा पर्या निबन्ध प्रतियोगितामा सहभागी १०८ निबन्धमध्येबाट छनोट गरिएका उत्कृष्ट ३२ निबन्धहरूको संग्रह पनि सार्वजनिक गरिने आयोजकले जनाएका छन् । तिनैमध्ये प्रथम, दोस्रो र तेस्रो स्थान हासिल गर्ने निबन्धकारहरूलाई पुरस्कारसहित सम्मान गरिनेछ भने बाँकी २९ प्रतियोगीलाई पनि प्रशंसापत्र प्रदान गरिनेछ ।

कार्यक्रमका प्रमुख अतिथि प्राज्ञ डा.अभि सुवेदी रहनुहुनेछ भने विशेष अतिथिका रूपमा ज्ञानबहादुर क्षत्री रहनुहुनेछ ।

गोष्ठीका की–नोट स्पिकरका रूपमा डा.गोविन्दराज भट्टराई तथा वक्ताका रूपमा डा. गीता त्रिपाठी र डा.अशोक थापा हुनुहुनेछ ।

कार्यक्रमको संयोजन लेखक विजय हितान स्वयंले गर्नुभएको हो । आयोजकका अनुसार यो गोष्ठीले वातावरण र साहित्यबीचको सम्बन्धलाई अझ मजबुत बनाउने लक्ष्य राखेको छ ।