मानव तस्करसँग सेटिङको आरोपमा पक्राउ परेका सहसचिव भट्टराई रिहा

काठमाडौँ । मानव तस्करसँग सेटिङको आरोपमा पक्राउ परेका गृह मन्त्रालयका सहसचिव तीर्थराज भट्टराई केही घण्टामै छुटेका छन् ।

अख्तियार दुरुपयोग अनुसन्धान आयोगले बोलाएको बखत उपस्थित हुने गरी भट्टराईलाई बुधबार राति कागज गराएर छोडेको हो । उनलाई बिहीबार अख्तियारमा उपस्थित हुन निर्देशन दिइएको छ ।

भिजिट भिसाको आवरणमा मानव तस्करसँग सेटिङ गरेर नेपालीलाई विभिन्न मुलुक पठाएको आरोपमा अनुसन्धानका लागि उनलाई अख्तियारले बुधबार दिउँसो नियन्त्रणमा लिएको थियो । त्रिभुवन अन्तर्राष्ट्रिय विमानस्थल कार्यालयका प्रमुख अध्यागमन अधिकृत रहेका भट्टराई मंगलबार बेलुका आकस्मिक रुपमा गृह मन्त्रालयमा तानिएका थिए ।

अख्तियारले भट्टराईलाई पक्राउ गर्नुअघि विमानस्थल अध्यागमन कार्यालयबाट कम्प्युटरलगायत विद्युतीय डिभाइस र कागजातसमेत नियन्त्रणमा लिएको छ ।

यो प्रकरणमा अख्तियारले सीआईटी कलेजमा कार्यरत कविता पौडेल, भक्तपुरका खगेन्द्र सुवेदी र काठमाडौं हात्तीसारस्थित ट्राभल एन्जेसी ग्रिनलाइन होलिडेजका सञ्चालक बालकृष्ण खड्काबाट समेत मोबाइल, ल्यापटप तथा अन्य कागजात पनि नियन्त्रणमा लिएको छ ।