एनआरएनहरुलाई निःशुल्क भिसा दिने प्रावधान राख्नु हास्यास्पद छ : प्रचण्ड

काठमाडौं । प्रमुख प्रतिपक्षी दल नेकपा माओवादी केन्द्रका नेता एवं पूर्वप्रधानमन्त्री पुष्पकमल दाहाल ‘प्रचण्ड’ ले एनआरएनहरुलाई निःशुल्क भिसा दिने प्रावधान राख्नु हास्यास्पद भएको बताउनुभएको छ ।

प्रतिनिधिसभाको बिहीबारको बैठकमा सम्बोधन गर्नुहुँदै अध्यक्ष प्रचण्डले भिसाको प्रावधान संविधानको मर्म र भावनाविपरीत पनि रहेको बताउनुभएको हो । ‘अहिले आएर एनआरएनहरुलाई निःशुल्क भिसा दिने प्रावधान राख्नु हास्यास्पद छ । संविधानले नै राजनीतिकबाहेकका सबै अधिकार नेपाली नागरिकसरह पाउने कुरा सुनिश्चित गरिसकेपछि फेरि भिसाको प्रावधान संविधानको मर्म र भावनाविपरीत पनि छ,’ उहाँले भन्नुभयो ।

अध्यक्ष प्रचण्डले एनआरएनलाई भिसाको प्रावधान लागू भएमा लगानी दुरुत्साहन हुने र आउँदो पुस्ता एनआरएनलाई नेपालसँग जोड्ने पहलमा पनि आघात पुग्ने धारणा राख्नुभयो । ‘यसले एनआरएन लगानीलाई मात्र दुरुत्साहन गर्दैन, दोस्रो तथा तेस्रो पुस्ताका एनआरएनलाई नेपालसँग जोड्ने पहलमा पनि आघात पुग्छ । त्यसैले संविधानले एनआरएनहरुलाई दिएको अधिकारमा दायाँबायाँ नहुने गरी तत्काल कार्यान्वयनमा ल्याउन म सरकारलाई खबरदारी गर्दछु,’ प्रचण्डको भनाइ थियो ।

उहाँले आफू प्रधानमन्त्री हुँदा गैर आवासीय नेपाली नागरिकता प्रदान गरिएको उल्लेख गर्नुहुँदै सरकारले सर्कुलर नगर्दा कार्यान्वयन हुन नसकेको बताउनुभयो । ‘हामी सबैको सहमतिमा नेपालको संविधानमा गैर आवासीय नेपाली नागरिकताको प्रावधान हामीले राख्यौं । म प्रधानमन्त्री हुँदा मेरै हातले एनआरएनएका तत्कालीन अध्यक्ष कुल आचार्यलाई पहिलो गैर आवासीय नेपाली नागरिकता प्रदान गरेँ । त्यसयता झन्डै चार हजार जना एनआरएनहरुले गैर आवासीय नेपाली नागरिकता लिइसक्नु भएको छ । तर सरकारले मातहतका निकायलाई एउटा सर्कुलरसम्म नगर्दा त्यसको कार्यान्वयन हुन सकेको छैन । यो कागजको खोस्टो सरह भयो भनेर उहाँहरुले गुनासो गरिरहनुभएको छ,’ उहाँको भनाइ थियो ।