नेपालमा सहिद सप्ताहको अन्तिम दिन स्मृतिसभा

काठमाडौँ । सहिद सप्ताहको अन्तिम दिन बुधबार काठमाडौँको लैनचौरस्थित सहिद पार्कमा ज्ञातअज्ञात सहिदहरूको सम्झनामा स्मृतिसभा आयोजना गरिएको छ ।

स्मृतिसभा सुरु हुनुअघि शान्ति बाटिकाबाट सुरु भएको प्रभातफेरी जमल, कान्तिपथ, केशरमहल हुँदै लैनचौर पुगेर स्मृतिसभामा परिणत भएको थियो ।

श्रद्धाञ्जलीसभामा महानगरपालिकाका उपप्रमुख सुनिता डङ्गोलले, सहिदहरूको बलिदानीबाट प्राप्त राजनीतिक, आर्थिक, सामाजिक, सांस्कृतिक रुपान्तरण र समावेशी लोकतन्त्र जोगाउन नेतृत्व तहको साझा मत हुनुपर्नेमा जोड दिनुभयो ।

राष्ट्रियता र जनजीविकाको पक्षमा सङ्घर्ष गर्ने क्रममा बलिदान गरेका सहिदहरू विगत, वर्तमान र भविष्यका निम्ति प्रेरणाका स्रोत र पथप्रदर्शकका रूपमा रहेका उहाँले धारणा राख्नुभयो । “सहिदहरूको योगदान स्मरण गर्दै कामपाले संरचना निर्माण गर्ने तथा सहिदको नाममा सेवा सञ्चालन गर्ने काम भइरहेका छन् ।

धर्मभक्त पार्क, माथेमाको नाममा मानव सेवा आश्रम निर्माण, सहिद गङ्गालाल हृदय रोग केन्द्रमा अक्सिजन प्लान्ट स्थापना र सञ्चालनलगायत काम कामपाले गरिरहेको छ”, उहाँले भन्नुभयो । “हुकुमी शासनको अन्त्य गर्न जनताको स्वतन्त्रता र स्वाधीनताका लागि सहिदहरूले आफ्नो प्राण आहुति दिएपछि प्राप्त भएको वर्तमान अवस्था हामीले उपभोग गरिरहेका बताउँदै उपप्रमुख डङ्गोलले लोकतान्त्रिक कानुनी शासन नै सहिदका सपना भएकाले सबैले सुशासन र कानुनी शासनलाई अवलम्बन गर्नुपर्नेमा जोड दिनुभयो ।

सहिद सप्ताह समारोह समितिका संयोजक ख्यामराज तिवारीले भन्नुभयो, “अहिलेको शासन, स्वतन्त्रता र स्वाधीनता सहिदहरूको बलिदानीबाट प्राप्त भएको हुनाले यसको गरिमा बचाउनु राजनीतिकर्मी तथ सबैको दायित्व हो ।” माफी मागेर शासकसामु झुक्नुभन्दा प्रजातन्त्रका लागि प्राण आहुति दिने चार जना र अन्य ज्ञातअज्ञात सहिदहरूको सम्झनामा हरेक वर्ष माघ १० गतेदेखि १६ गतेसम्मलाई सहिद सप्ताहका रूपमा मनाइँदै आइएको छ । विसं २०१२ देखि विद्यमान महानगरको संयोजकत्व गठित समितिले सहिद सप्ताहमा कार्यक्रम आयोजना गर्दै आएको छ ।

यस वर्ष माघ १० गतेअर्थात् पहिलो दिन शुक्रराज शास्त्रीले सहादत प्राप्त गर्नुभएको स्थान टेकु मचलीमा, दोस्रो दिन १३ गते धर्मभक्त माथेमालाई मृत्युदण्ड दिइएको स्थान सिफल उकालोमा र १५ गते विष्णुमती नदी किनारा शोभाभगवतीमा गङ्गालाल श्रेष्ठ र दशरथ चन्दले सहादत प्राप्त गर्नुभएको स्थानमा रहेका सहिदको सालिकमा पुष्पगुच्छा अर्पण तथा स्मृतिसभा गरिएको थियो ।

चार सहिदका सालिकमध्ये महानगरपालिकाले विसं २०७५ मा शास्त्रीको र विसं २०७६ मा माथेमा, श्रेष्ठ र चन्दको पूर्ण कदको सालिक स्थापना गरिसकेको छ । प्राणदण्ड हुनसक्छ भन्ने जान्दाजान्दै नागरिक स्वतन्त्रताका पक्षमा निर्भिक भएर आवाज उठाउने शास्त्री, माथेमा, श्रेष्ठ र चन्दले १९९७ सालमा मृत्युदण्ड पाएपछि उहाँहरूको सपना स्मरण गर्दै सहिद दिवस मनाउने गरिएको हो ।

राणा शासनको विरोध गर्दै जनतालाई प्रजातन्त्रको पक्षमा एकजुट एवं शिक्षित गरेको आरोपमा विसं १९९७ माघ १० गतेदेखि १५ गतेबीच चार जना सहिदलाई प्राणदण्ड दिइएको थियो ।