किराँत सुनुवार सेवा समाज बेलायतको आठौं अधिवेशनबाट अध्यक्षमा आकाश चयन

लन्डन । किराँत सुनुवार सेवा समाज बेलायतको आठौं अधिवेशनले नयाँ कार्यसमितिको चयन गरेको छ ।

शनिबार ११ जनवरी २०२५ मा सम्पन्न समाजको अधिवेशनले आकाश सुनुवारको अध्यक्षतामा नयाँ कार्यसमिति चयन गरेको हो । कार्यसमिति अध्यक्षमा आकाश, उपाध्यक्षमा केदार सङ्केत र प्रकाश सुनुवार, सचिवमा परिस्पा सुनुवार, उपसचिव सुमी सुनुवार, कोषाध्यक्ष खजेन्द्र बिक्रम सुनुवार र उपकोषाध्यक्षमा मिलन सुनुवार चयन हुनुभएको पूर्वअध्यक्ष जंगबहादुर सुनुवारले जानकारी दिनुभयो ।

आठौं निर्वाचन आयोगमा पूर्वअध्यक्षद्वय जितेन्द्र सुनुवार तथा यादवकुमार दर्सुचा र पूर्वसचिव छत्र सुनुवार रहनुभएको थियो । निर्वाचन आयोगका संयोजक एवं पूर्वअध्यक्ष जितेन्द्र सुनुवार नयाँ कार्यसमितिको नामावली घोषणा गर्नुभएको थियो ।

अधिवेशनको पहिलो सत्रमा अध्यक्ष मनोजकुमार सुनुवारले आफूले तीन वर्षमा काम समेटेको कार्यपत्र प्रस्तुत गर्नुभएको थियो भने कोषाध्यक्ष इन्द्रकुमार सुनुवारले वार्षिक आय-व्याय प्रस्तुत गर्नुभएको थियो ।

अधिवेशनमा सुनुवार सेवा समाज बेलायतका संस्थापक तथा पूर्वअध्यक्ष विजयकुमार मुखियाले सन् २०१७ सालदेखि २०२२५ सालसम्म संस्थामा कार्यरत सबैलाई धन्यवाद दिनुभयो । त्यसैगरी पूर्वअध्यक्ष जंगबहादुर सुनुवारले कार्यसमितिमा जोसुकै चयन भए पनि संस्थाको विधानलाई आधार मानेर संस्थालाई आगामी दिनहरूमा सकारात्मक तरिकाले अगाडि डोर्‍याउने छ भन्नेमा आफू ढुक्क भएको बताउनुभयो ।

नयाँ आउने सम्पूर्ण पदाधिकारीहरूलाई कार्यकाल सफलताको लागि अध्यक्ष मनोजकुमार सुनुवारले शुभकामना व्यक्त गर्नुभएको थियो ।

नवनिर्वाचित अध्यक्ष आकाश सुनुवारले आफ्नो समाजको अध्यक्ष बन्नु राष्ट्राध्यक्ष हुनुभन्दा पनि ठूलो मानेको बताउनुभयो । उहाँले भन्नुभयो, ‘टिममा चयन गरिएका समितिका सदस्यहरू केवल सेवक हौँ, जसले तपाईंहरूको हित र भविष्यका लागि काम गर्नुपर्नेछ । मेरो नेतृत्वको यो कार्यकाल तपाईं सबैको एकता र प्रगतिका लागि समर्पित हुनेछ ।’

अधिवेशनमा समाजका सल्लाहकार, बुद्धिजीवी, साहित्यकार, युवा समूह तथा संस्थाका पूर्वपदाधिकारीलगायतको बाक्लो उपस्थिति थियो ।