तमु धीं यूकेको कार्यक्रमका लागि कलाकारद्वय राजबहादुर र आश्रम बेलायतमा

लन्डन । तमु धीं यूकेको शनिबार २८ डिसेम्बरमा हुने रजत महोत्सव तथा तमु ल्होछार कार्यक्रमका लागि कलाकारहरू राजबहादुर गुरुङ र आश्रम गुरुङ बेलायत आइपुग्नुभएको छ ।

कलाकारहरु राजबहादुर र आश्रम बिहीबार साँझ लन्डनस्थित हिथ्रो विमानस्थल उत्रिनु भएको हो । उहाँहरूलाई स्वागत गर्न तमु धीं यूकेका नवनिर्वाचित अध्यक्ष जुमकाजी गुरुङ, उपाध्यक्ष एवं ल्होछार संयोजक कमल गुरुङ, उपाध्यक्ष परशु गुरुङ र उहाँकी श्रीमती, पूर्वअध्यक्षहरू रामचन्द्र गुरुङ र ज्ञाम गुरुङ, सल्लाहकारहरू दिलराज गुरुङ र कुमार गुरुङ, कार्यसमिति सदस्य भोज गुरुङ र श्रीमती, सचिव विमल गुरुङ, कार्यसमिति सदस्य दीपक गुरुङसहित कलाकारका आफन्त स्वागत गर्न विमानस्थलमा पुग्नुभएको थियो ।

तमु धीं यूकेले २८ डिसेम्बरमा ह्यारो लेजर सेन्टरमा रजत महोत्सव तथा तमु ल्होछार मनाउँदै छ । ल्होछारका लागि गायिका तृष्णा गुरुङ यसअघि नै आइसक्नुभएको छ । यो पटकको ल्होछारका लागि तमु धीं नेपालका अध्यक्ष हुमबहादुर गुरुङ, तमु धीं जापानका उपाध्यक्ष अरमान गुरुङ, लामा गुरु गुप्ती लगायत पनि बेलायत आइसक्नुभएको छ ।