किराँत राई यायोक्खा बेलायतले अगस्ट १० मा यलम्बर स्मृति दिवस मनाउने

लन्डन । प्रथम किराती राजा यलम्बरको स्मृति दिवस बेलायतमा पनि धूमधामका साथ मनाइने भएको छ । 

किरात राई यायोक्खा बेलायतले विगतमा जस्तै यस वर्ष पनि आगामी १० अगस्टमा विभिन्न खेलकुद तथा सांस्कृतिक कार्यक्रमसहित दिवस तथा किरात हाउस खरिद वार्षिक उत्सव मनाउने तयारी गरेको हो ।

कार्यक्रम किरात हाउस गेम्बल्स लेनमा हुने यायोक्खा बेलायतका अध्यक्ष मेजर योगेश कोयी राईले बताउनु भयो । उहाँका अनुसार उक्त दिन धनुषवाण रनिङसिल्ड प्रतियोगिता, यलम्बरहाङ स्मृति कप महिला तथा पुरुष भलिबल, एक तोला सुनको लक्की ड्र (भाग्योदय चिट्ठा) हुनेछ ।

यसैगरी, मास्टर डिग्रीभन्दा माथि शिक्षा हासिल प्राप्त वा कुनै पनि विधामा उत्कृष्ट व्यक्तिलाई सम्मान, किरात मूलघर खरिद गरेको विशेष वार्षिक उत्सव (दशौँ  वर्षगाँठ), यलम्बर सांस्कृतिक सांगितीक शृंखलाजस्ता कार्यक्रम हुनेछन् ।  

कार्यक्रममा उपस्थित भएर अवलोकन तथा मनोरञ्जन लिनका लागि अध्यक्ष राईले निमन्त्रणा गर्नु भएको छ ।