राष्ट्रिय सभा निर्वाचनमा गठबन्धनका १८, एमालेका एक विजयी

काठमाडौँ । राष्ट्रिय सभा सदस्यको १९ रिक्त स्थानमा आज सम्पन्न मतदानमा सत्ता गठबन्धनका उम्मेदवार १८ स्थानमा र एक स्थानमा प्रतिपक्षी दल नेकपा एमालेका उम्मेदवारले विजयी हासिल गरेका छन् ।
सात वटै प्रदेशमा सम्पन्न मतदानको मतपरिणाम सार्वजनिक हुँदा कोशी प्रदेशबाट प्रतिनिधित्व गर्ने महिला सदस्यबाहेक अन्य स्थानमा गठबन्धनका उम्मेदवारले जितेका छन् ।
कर्णाली प्रदेशबाट सत्ता गठबन्धनका दलित समूहतर्फ नेकपा (माओवादी केन्द्र)का विष्णु बिक, महिला समूहतर्फ नेकपा (एकीकृत समाजवादी)का सावित्री मल्ल र अन्य समूहतर्फ नेपाली कांग्रेसका कृष्णबहादुर रोकाय विजयी हुनुभएको सहायक निर्वाचन अधिकृत उज्ज्वलदेव रावलले जानकारी दिनुभयो ।
विकले तीन हजार आठ १७, मल्लले तीन हजार सात सय २२, रोकायले तीन हजार आठ सय ७० मतभार प्राप्त गर्नुभयो ।
यसैगरी, कोशी प्रदेशबाट राष्ट्रियसभा सदस्यमा नेपाली कांग्रेसका कृष्णप्रसाद सिटौला र नेकपा (एमाले)की रुकमणी कोइराला विजयी हुनुभएको छ ।
सिटौलाले पाँच हजार दुई सय ९२ र कोइरालाले पाँच हजार ८६ मतभार प्राप्त गर्नुभयो ।
गण्डकी प्रदेशमा सत्ता गठबन्धनबाट अन्य समूहमा नेपाली काँग्रेसका किरणबाबु श्रेष्ठ, महिलातर्फ नेकपा(माओवादी केन्द्र)की मनरुपा शर्मा र अपाङ्गता÷अल्पसंख्यक समूहबाट नेपाली काँग्रेसका पदमबहादुर परियार विजयी हुनुभएको हो ।
श्रेष्ठले कूल तीन हजार आठ सय आठ, शर्माले तीन हजार छ सय ६० र परियारले कूल तीन हजार सात सय ७४ मतभार प्राप्त गर्नुभयो ।
बागमती प्रदेशबाट राष्ट्रियसभा सदस्यमा सत्ता गठबन्धनका उम्मेदवार विजयी हुनुभएको छ ।
महिला समूहबाट सत्तागठबन्धनका उम्मेदवार कांग्रेसकी विष्णुकुमारी पुडासैनी छ हजार छ सय २२, दलिततर्फ नेकपा (एकीकृत समाजवादी)का घनश्याम रिजाल विश्वकर्मा छ हजार पाँच सय १२, अन्यतर्फ कांग्रेसका जितजङ्ग बस्नेतले छ हजार पाँच सय ३१ मतभार प्राप्त गरी विजयी हुुनुभयो । साथै अपाङ्गतातर्फ नेकपा (माओवादी केन्द्र)का श्रीकृष्ण अधिकारीले छ हजार चार सय ३६ मतभार प्राप्त गरी निर्वाचित हुनुभयो ।
लुम्बिनी प्रदेशमा सत्ता गठबन्धनका तर्फबाट नेकपा माओवादीका झक्कुप्रसाद सुवेदी र नेपाली कांग्रेसबाट उम्मेदवार बनेकी विष्णुदेवी सापकोटा विजयी हुनुभएको छ ।
सुवेदीले पाँच हजार चार सय ३५ र सापकोटाले पाँच हजार चार सय ३५ मतभार प्राप्त गर्दै विजयी हुनुभएको निर्वाचन अधिकृत कुलप्रसाद पाण्डेले जानकारी दिनुभयो ।
सुदूरपश्चिम प्रदेशबाट राष्ट्रियसभा सदस्यमा सत्ता गठबन्धनका तर्फबाट उम्मेदवार बन्नुभएका नेपाली कांग्रेसका बलदेव बोहरा र नारायणदत्त भट्ट र नेकपा (माओवादी केन्द्र)का रेनु चन्द विजयी हुनुभएको छ ।
बोहराले चार हजार तीन सय २८, भट्टले चार हजार चार सय १९ र चन्दले चार हजार चार सय ५३ मतभार पाउनुभयो ।
मधेस प्रदेशबाट दुई पदका लागि भएको निर्वाचनमा सत्ता गठबन्धनतर्फका दुवै उम्मेदवार विजयी हुनुभएको छ ।
नेपाली कांग्रेसका उम्मेदवार आनन्दप्रसाद ढुङ्गाना र महिला समूहबाट जनता समाजवादी पार्टी (जसपा) का उम्मेदवार पूजा चौधरी निर्वाचित हुनुभएको हो ।
सात हजार तीन ७० र सात हजार नौ सय २३ मतभार प्राप्त गर्नुभयो ।