बेलायतमा अप्रिल २३ मा दिउँसो ३ बजे मोबाइलमा संकट चेतावनी प्रविधि परीक्षण हुने  

लण्डन । बेलायतमा यही अप्रिल २३ तारिखका दिन दिउँसो ३ बजे सरकारले राष्ट्रव्यापीरूपमा संङ्कटको चेतावनी दिने प्रविधिको परीक्षण गर्ने भएको छ ।

सो परीक्षणअन्तर्गत फोर जी र फाइव जी सेवा भएका हरेक मोवाइलमा १० सेकेन्डसम्म चेतावनीको संकेत दिने आवाज आउने छ भने मोवाइल पनि थर्कने (भाइब्रेट) हुनेछ । खतरा चेतावनी दिने यस्तो संकेतले जीउज्यानको खतरा भएको अवस्था जस्तै आगलागी वा बाढीका बारेमा सर्वसाधारणलाई तत्काल सूचित गर्नेछ र उनीहरूले बचाउको उपाय अपनाउन पाउने छन् ।

अमेरिका, नेदरल्याण्डस र क्यानाडाले यस्तो प्रविधि अपनाइसकेका छन् ।

बेलायतमा पनि राष्ट्रव्यापी रूपमा परीक्षण गर्नु पहिले सानो क्षेत्रमा इस्ट सफोक र रेडिङमा सफलतापूर्वक भइसकेको छ ।

सो दिन हरेक मोवाइल फोनको स्क्रीनमा खतराको चेनावनीयुक्त सन्देश आउने छ साथसाथै त्यस्तै किसिमको आवाज पनि आउने छ भने मोवाइल थर्कने छ । यो अवधि १० सेकेण्डको रहने छ ।

यो परीक्षण मात्र भएकाले सर्वसाधारणले केही गर्न पर्ने छैन । आवाज तथा भाइब्रेसन १० सेकेण्डपछि आफैँ बन्द हुनेछ तर मानिसहरूले आफ्नो मोवाइलको स्क्रीनमा ‘ओके’ लेखिएको बटनमा क्लीक भने गर्न पर्नेछ । त्यसपछि मोबाइल फोन सामान्य रूपमा चलाउन सकिने छ ।

सो दिन खेलकुदका विभिन्न प्रतियोगिता परेकाले परीक्षणबाट न्यूतम मात्र असर परोस् भनेर सरकारले विभिन्न निकायहरूसित समन्वय गरेको जनाएको छ ।

बेलायतका मन्त्री ओलिभर डाउडेनले अप्रिल २३ लाई आफ्नो डायरीमा टिप्न सर्वसाधारणलाई अनुरोध गरेका छन् । यस प्रविधिको परीक्षणका कारण संकटको अवस्थामा सर्वसाधारणको जीउ ज्यानको सुरक्षा गर्नु रहेको उनले बताएका छन् ।

न्याशनल फायर काउन्सिल चिफ्सका अध्यक्ष मार्क हार्डिङघमले १० सेकेण्ड कसैका लागि असुविधाजनक होला तर आगामी दिनका लागि यो जीवन बचाउने उपाय हुन सक्छ भन्दै असुविधाका लागि अग्रिम क्षमायाचना गरेका छन् ।

न्याशनल पुलिस चिफ काउन्सिलका ओवेन वेदरीलले आपतविपतको बेलामा सर्वसाधारणलाई सावधानीको सूचना दिनु महत्त्वपूर्ण रहेको र भविष्यमा सर्वसाधारणलाई सुरक्षा गर्न यस्ता प्रविधि कसरी विकसित गर्दै लैजाने भन्ने बारेमा साझेदार निकायहरूसित समन्वय गर्ने बताएका छन् ।

यस प्रविधिबाट बेलायतमा रहेका ९० प्रतिशत मोबाइल फोनमा खतराको संकेत पठाउन सकिने विश्वास गरिएको छ । तर यथार्थमा यस्तो संकेत राष्ट्रव्यापीरूपमा भने कमै प्रयोग हुन्छ । क्षेत्रीय रूपमा भने बाढी वा आगलागीका समयमा प्रयोग हुन सक्छन् ।

मानिसहरूले भने युरोपमा लडाइँ चलिरहेको बेलामा गरिएको यो परीक्षणले कतै आणविक हतियारको प्रयोग भएको अवस्थाका लागि तम्तयारी त गरिएको होइन भन्ने आशंका पनि गरेका छन् ।